Chhun dar 12-ah Police Vs FC Bethlehem

Zote Honda MPL9-ah Mizoram Police leh FC Bethlehem te vawiin chhun dar 12:00 hian KzDFA ground, Mualvawmah an inkhel dawn. Police hi Mizo player ṭha rual awm khawmna an ni a, Bethlehem hi tawnhriat nei ṭha player Sena Ralte captain-na hnuaia khel an ni.

MPL9 khelh tawh chinah Bethlehem inkhel a nung ziah a, a chhan chu goal a luh tam ṭhin vang a ni. MPL kai thar hian goal 12 zet chhuahin goal chhuah tam ber mah se goal 10 khung tawhin anni aia khung tam chu Aizawl FC chauh an awm.

Bethlehem hian tun inelnaa goal la khung tam ber Lalbiakdika an kawl a, Champhai Zotlang tlangval hian Khawzawlah ṭawiawmtu a neih ṭhat a rinawm. Bethlehem hian Champhai Kanan champion puitu midfielder JH Remlala an nei bawk.

FCB coach Victor Lalbiakmawia chuan, "Police hi player thlir chuan team ṭha ber an ni a, champion rinkai pawh an ni. Amaherawhchu khelh ṭhat ni leh chhiat ni an nei a, beisei tur kan nei. Chak tumin kan khel dawn," tiin Vanglaini a hrih.

Mizoram Police hian striker ṭha Malsawm-fela an kawl a, Mizoramin Santosh Trophy an champion ṭuma player F. Lalrinpuia, Lalfakzuala, Lalbiakhlua (Biaktea), Lalrinzuala Khiangte leh Ronald Zothanzama te an awm. Mizo footballer zinga thleng sang ber ber an ni a, I Day Football champion lai an nih bawk avangin Khawzawl mipui mit an tlai phak ngei a rinawm.