Tlai dar 3:00-ah football hmuhnawm

Zote Honda MPL9-a inkhel hmuhnawm tur zinga mi Aizawl FC leh Chhinga Veng FC te inkhel tur chu Khawzawlin an chang. Khawzawl mipuiin coach tawnhriat nei ṭha Standly Rozario kaihhruai I League club inkhel an hmu dawn a, an khingpui tur hi tualchhung club ṭha Chhingcows an nih avangin a hmuhnawm ang.

Chhinga Veng hian match nga an khelh tawhah ṭum khat chiah goal an la chhuah a, match liah an clean sheet. Anand Gurung leh Lalremruata hote hian tlarhnung an rem phui ṭhat avangin eng team tan pawh hmachhawn châkawm lo an ni a, keeper RS Lallawmzuala a che ṭhat bakah defender-te an khel ṭha bawk.

Chhingcows coach Anand Gurung chuan, "Khawzawl ground hi a ṭha a, a zau ṭhat bakah a la thar ṭhat avangin RG Stadium aiin khelh a nuam zawk dawn. Ground ṭha hi team ṭha tan a ṭha a, Aizawl FC pawh khelh an har sawt ang," tiin a sawi.

Chhinga Veng hian an match hnuhnung berah Chawnpui FC 1-0 in an hneh a, hmei ṭuma man of the match F. Lalrohlua hi kumin I Day Football (Khawzawl) ah khan best player a ni. Rohlua hi Khawzawlah a tlangnel dawn a, tualchhung mipuite pawhin an thlawp ṭha ang.

I League club Aizawl FC squad a chhah ṭha a, Khawzawlah hian player 22 an hruai. Inter Village 2022-a best player Lalramsanga leh top scorer R. Ramdinthara te an hruai tel a, anni pahnih hi Champhai Kanan tlangval an nih avangin ṭawiawmtu an neih ṭhat a rinawm.

MPL khel tawh chinah Aizawl FC an khel ṭha ṭhin hle. I League club hian Police lakah chak lo mah se Chanmari FC 4-0 in an hneh leh tawh a, tualchhung player ṭha awm khawmna an nih avangin inkhel hmuhnawm an chhawp chhuak thei ang.