Europa League Man United leh Arsenal inlar hun
Thawhlehni leh Nilaini zanah Champions League khelh a ni ṭhin a, zanin erawh Europa League khelh hun a ni. European football en turin Manchester United leh Arsenal ṭantute men rei hun a her chhuak ve leh ta.
Man United inkhelh hun a hma hret, zanin dar 10:15 hian Cyprus club Omonia hmachhawn turin Tsirio Stadium-ah an lenglut ang. Arsenal chuan dar 12:30 hian Emirates Stadium-ah Norwegian club FK Boda/Glimt an mikhual thung dawn a ni.
Ronaldo hun
Kar tawp Manchester derby-ah Man United an mualpho a, an hmelma club lakah 6-3 in an chak lo. Erik ten Hag-a'n an mualpho nasat em avangin Cristiano Ronaldo chu mualpho tura luhtir ve duh ta lo a nih thu a sawi a nih kha.
Man United captain hlui Roy Keane-a'n ṭawngkam a lo nei zui ve bawk, chhuak duh reng si an chelh a, mahse an khelh tir leh si lo chu a hrethiam lo. Keane thusawi hi a dikna chen a awm, an player zinga hlawh hnem ber hi khelmuala a luh a ngai.
Dutch manager Ten Hag-a'n Ronaldo hi inkhel loa dah reng ngawt chu a duh bik lo ang. Premier League-ah a chhawr rim lo a nih pawhin Europa League hi a chhawrna tur a ni ngei ang, zaninah pawh a hmel hmuh beisei ila a sual lo ang.
Tlarhmaah Ronaldo a awm chuan an buai lo tura ngaih a ni. A hnung lam hi eng tianga rem tur nge hriatthiam a la harsa. England tana a feh chhuahna lamah Harry Maguie a inhliam a, club tan a la inlan rih lo - Raphael Varane pawh City nen an inkhelh ṭumin thlak a ngai.
Victor Lindelof a dam ṭha a, ani dinpui tur hian hliam damkawr pahnih zinga pakhat zawk an lut a nih loh chuan, league lama a chhawr rim Lisandro Martínez a inlan zui leh mai a ngai ang. Kar tawpah Everton an tum zui dawn avangin a theih anga tam player insiksawi chu an ngai ang.
Indahṭha dawn
Premier League hmahruaitu Arsenal hi Europa League an group awmnaah hmahruaitu an ni lo, zanina an tum tur Bodo/Glimt hnuaiah hian an awm. Mahse, Gunners hi an match khelh tur pakhat a hun sawn a ni a, match khat chauh an la khelh avangin dem theih erawh an ni lo.
October thla chhungin match khelh tur a tam a, kartawpah Liverpool an mikhual zui dawn bawk. Manager Mikel Arteta chuan Europa League khel turin a player naupang leh league lama a chhawr ngai lohte a ko khawm.
Training an neih dan thlir chuan Cedric Soares leh Reiss Nelson te pawhin hmun an chang ve leh dawn niin a rin theih. Ben White-a'n a nek chhuah mek Takehiro Tomiyasu tan pawh a khelhna hmun nei leh leh thei tura beihna hun a ni ang.
Soares leh Tomiyasu te hian khelhna hmun an inchuh a ngai mai thei, chutihrualin Arteta-a'n match ṭhenkhata a hman angin Soares hi mual lehlam sirah a dah thei bawk, a ṭul hunah chuan a khelhna hmun sawnsak theih a ni.
Europa League an match hmasa zawkah khan - Fabio Vieira, Matt Turner, Eddie Nketiah, Albert Sambi Lokonga leh Marquinhos te hmangin point thum an hmu thei a, zaninah pawh anni ho bawk hi an hmachhuan an ni leh dawn.