Premier League mangṭha tu David Silva

Manchester City legend David Silva chuan Pathianni zan khan a Premier League match hnuhnung ber chu Norwich City lakah a khel a, 5-0 in an chak. Spanish midfielder hi season tharah khawi lamah nge a kal dawn la chiang lo mah se English football chu a mangṭha ta.

Etihad Stadium-ah minute 85-na a ni a, khelmual aṭangin Pep Guardiola-a'n Silva a la chhuak. Kum 34 mi Silva a chhuah lai hian Pep leh Man City mi leh sa bakah stadium chhunga journalist awmte chuan ding chungin zahna chibai an buk. Covid-19 leng lo se chuan midfielder ropui Silva hi stadium khat tlata fans pungkhawm chuan zahna chibai an buk ngei ang. Coronavirus vangin stadium a ruak a, a phu ang tawk zahna dawng lo mah se khelmual chhunga awmte chuan an theih tawpin an chawimawi.

Spanish midfielder hian Man City tan season 10 chhung a khel a, Premier League nomawi pali leh FA Cup pahnih a chawisak hman. Season kal laiah Champions League khelh hmabak an la nei, European football inelna sang ber nomawi chawi chunga a hun tawp ber hman pui an duh ngei ang. Manchester City hian an match hnuhnung bera Norwich City an mikhual ṭum hian Kevin de Bruyne-a'n goal hnih a khung a; Gabriel Jesus, Raheem Sterling leh Riyad Mahrez ten goal khat ṭheuh an khung bawk.