Hmalam kan pan ang - Verstappen

Formula 1 driver championship hmahruaitu Max Verstappen chuan beiseina nen Japanese Grand Prix a thlir a, remchang a nei a nih chuan champion nomawi a kawl lai chu humhim tura nemngheh nghal a duh.

Intlansiak hnuhnung ber Singapore Grand Prix-ah khan Verstappen hian beisei a phak lo, a thleng hmasa zual pathum zingah pawh a tel lo hial. Mahse, championship lamah erawh a la sang fal nalh.

Tun kar tawp hian Suzuka tlankawngah inelna an hmachhawn leh dawn. Hripui leng vangin Japan ramah hian kum thum chhung F1 inelna an nei thei lo, tunah chuan hri leng an thunun theih tawh avangin intlansiak an thleng leh tawh dawn.

Red Bull driver Max chuan, "Marina Bay Street Circuit-ah khan ka duh angin ka tlan lo, min ṭantute beisei ang pawh ka phak lo tih ka hria. Tunah chuan Suzuka a ni tawh dawn, hmalam kan thlir tur a ni ang.

"Engmah sawi lawk theih a la ni lo, a nihna takah chuan F1-ah chuan inlena kan hmachawn zo thei hrim hrim a nih chuan a lawmawm ṭhin. Chutihrualin a hmasa ber nih ngei ka tum dawn a, remchang ka nei a nih phawt chuan champion ka duh," tiin a sawi.