Mang ram ata Barca kaih harhin an awm!
Barcelona-in league match sarih an khelh tawhah tlawm an nei lo a, La Liga hmahruaitu an ni - nipui transfer-a bazar nasa tak team hi an phur vanglai tak a ni.
Mahse, Champions League-ah Barcelona hi kaih harhin an awm a, Inter Milan chuan 1-0 in an lo hneh - inkhela goal awmchhun hi Hakan Calhanoglu khung a ni a, Catalan club-in a chhanletna tur an nei lo.
Group C inkhel dangah Bayern Munich chuan 5-0 ngawtin Viktoria Plzen an sawp a, Leroy Sane (2 goals), Serge Gnabry, Sadio Mane leh Eric-Maxim Choupo-Moting ten goal an khung.
Bayern-in hnehna an la chan vek avangin group C-ah point kua neiin hma an hruai a, Inter (6 points) chu pahnihna niin Barca hian point thum chiah neiin, pathumna an ni mek - last 16 lut tura an dinhmun a derthawng.
Inter beiseina
San Siro-a team pahnih inkhelh hmain Inter boss Simone Inzaghi chu dinhmun derthawng a ni a, Serie A match riat an khelh tawhah vawi li an tlawm a, table-ah pakuana an ni bawk.
Inzaghi-a'n a dinhmun a derthawng tih a hai lo a, mikhual Barca lakah chak a tum ngam - Inter hian chance pawh an nei hmasa zawk a, minute sarihna leka Calhanoglu-a long range shot Marc-André ter Stegen-a dante chu pui tak a ni.
Minute 23-naah Barca an vannei nawn - Eric Garcia chuan chiang zetin penalty box-ah a kutin ball a tawk fuh a, Barca hi penalty chawi ngei tura ngaih an ni. Mahse, he thil thlen hma hian Lautaro Martínez chu a lo offside hman a, penalty pek an ni lo.
Mahse, Inter an beidawng duh lo. Firts half hun pek belh minute hnihnaah Calhanoglu kan hmu a, Turkish attacking midfielder hian penalty box pawn aṭangin lei hrulah ṭha zetin a pet goal.
Barca an thamral
Catalan club-in an tlawm leh chuan an dinhmun a derthawng thei dawn tih an hria a, an ṭang hle - Barca player-ten mawi taka ball an inpek kual hnuah Ousmane Dembélé chuan hnai set sawt aṭangin post a tih per a, uiawm tak a ni.
Minute 66-naah Pedri chuan si phurh a sutah a inngai a, an lawm nasa hman hle. Mahse, video assistant referee hmanga ennawn a nih hnuah, Ansu Fati chuan a kutin ball a lo tawk fuh hman tih a lang a, pawm a ni lo.
Hun tawp lamah Barca-in penalty an beisei a, mahse, Denzel Dumfries-a'n a kuta ball a tawh fuh chu VAR hmanga ennawn a nih hnuah pawm a ni lo - Barca boss Xavi chuan, "Ka lawm lo takzet a, rorelna dik lo a thleng a ni," a ti a, a lawm lo hle.
Hetihlai hian Robert Lewandowski a reh a, La Liga lama harhvang tak striker hian Barca tan Champions League lamah a danglam bikna a pholang rih hleithei lo - coach Xavi chu referee bula a kam tam hret avangin yellow card pek a ni bawk.
Bayern chak chiang
German club Bayern-in tun season-ah beisei an phak lo hle - league match li zet a zawna an chak zawh loh hnuin kar hmasa khan an chak ve leh khauh a, Champions League-ah erawh Inter (2-0) leh Barca (2-0) hneh tawh an nih avangin an inringtawk.
Mahse, Czech champion nen an intawn hmain Joshua Kimmich leh Thomas Muller ten Covid-19 an kai tih hmuhchhuah a ni a, Viktoria lakah goalkeeper tiam loha bench-a an player neih zat chu panga chauh a ni!
Allianz Arena-a inkhelah Bayern tan buaina erawh a awm phah lo - Sane chuan minute sarihna lekah goal hmahruai a khung a, Gnabry leh Mane ten rawn belhchhahin, chawlhlawk an hman hian 3-0 a ni der tawh.
Second half-ah Sane bawkin goal khungin bul a ṭan leh a, bench aṭanga luhtir Choupo-Moting chuan chak nemnghehna goal a khung bawk - Bayern an chak chiang a, Jamal Musiala goal khung offside vangin an pawm lo mah mah!
Final khelh tur hmabak match thum kan la nei. Kan tlawm a, mahse, match thum khelh kan la bak zinga match hnih chu kan muala khel tur kan ni a, final tak tak an ni dawn. Kha aia nawr na zawk tur kan ni a, first half-ah kan khel ṭha tawk lo a, kan tihsual kan inen a ṭul. Zanin kan result-ah hian kan lawm lo takzet a ni. - Xavi, Barcelona boss