Liverpool an chak; tho hlen thei tak maw?

Champions League-ah Liverpool chuan 2-0 in Rangers an hneh a, Brighton & Hove Albion (3-3) nena inhnehtawk hlim Reds ṭantute tan result lawmawm a ni.

Liverpool fan-te lawmna belhchhah turin tun hnaia sawisel hlawh Trent Alexander-Arnold leh Mohamed Salah (penalty) ten goal khat ve ve an khung a, last 16 an hnaih ta sawt.

Reds hian Pathianni zanah Premier League hmahruaitu Arsenal an lenchilh chhunzawm dawn a, tun season-a beisei phak lo Liverpool fan-ten an mangchhia mangṭha hlen an beisei ang.

Group A inkhel dangah Ajax-in Mohammed Kudus hmangin goal hmahruai khung mah se, Napoli-in Giacomo Raspadori (2 goals), Giovanni di Lorenzo, Piotr Zielinski, Khvicha Kvaratskhelia leh Giovanni Simeone hmangin an chhanglet a, 6-1 in an chak.

Hei le Arnold
Liverpool-in beisei angin season bul an ṭan lo a, a bik takin Reds tlarhnung nghin chhanah Arnold-a'n kawh rawn a hlawh a, World Cup-ah England tana a inlan phak loh hlauhthawnna hial a awm hman.

Mahse, English full back hian en kan mai mai chi a ni lo tih Rangers lakah a pholang a, minute sarihna lekah yard 25 vela hla aṭangin mawi zetin a khung - ball pet thiam bik ke aṭanga chhuak a ni.

Liverpool-in chance dang vawi tam an nei chungin an goal hnihna an khungna erawh penalty a ni a, Leon King-a'n player hnawksak Luis Diaz lakah penalty a chawi a, Salah chuan harsatna nei loin goal-ah a chantir.

Rangers-in Liverpool 'puja' fuh lo lai tak an tawng chungin team pahnih quality a inthlau hret a, hun tawp dawna Rabbi Matondo-a pet, Kostas Tsimikas-a'n goal line aṭanga a lo pet chhuak hman tih loh chu chance sawi tur an nei lo.

Beiseina thar
Jurgen Klopp-a'n Rangers lakah formation 'thar' a rawn enchhin a, 4-2-3-1 a player rawn remin Diaz leh Salah bakah forward Diogo Jota leh Darwin Nunez ten bul an ṭan a, German coach-in thil thar a rawn chhawp.

Mipui mit fukna Nunez a khel chhe lo a, a che vel a hmuhnawmin a thawkrim bawk. Mahse, Uruguayan striker hian chance vawi tam a nei chungin a finishing a tawih tawk lo a, Rangers keeper Allan McGregor-a'n a hna a tlin tel bawk.

Liverpool boss Jurgen Klopp chuan, "Tlarhmaa kan chet dan vel kha hmuhnawm a tling a, kan formation thar ang khan session khat chiah kan inenchhin hman tih ngaihtuah phei chuan ṭha tak a ni," a ti a, Nunez leh Jota khelh dana a lawm thu a sawi bawk.

Klopp chuan, "Kan khelh danah ka lawm a, point thum kan hmu a, chu chu a pawimawh ber chu a ni. Chanchinbu chhiar hlan ka nghakhlel tawh hle - min sawiselna pawh ka pawm thlap a, dinhmun awhawm takah kan ding rih lo bawk a ni," a ti a, a naute inpeknaa a lawm thu a sawi tel.