Atletico Madrid an mualpho

Club Brugge khelmualah Atletico Madrid an chak zo lo mai a ni lo a, an tlawm - Thawhlehni zan khan Spanish club hian khualmualah Belgian club an lenchilh a, 2-0 a tlawm chungin an haw.

Mualneitu team tan Ferran Jutgla chuan Atletico defender rual a paltlang hnuah Kamal Sowah tan a siamsak a, kum 22 mi midfielder Sowah hian harsatna nei loin goal-ah a lo chantir.

Spanish forward Ferran Jutgla a langsar a, season hmasa lawka Barca tana khel forward hian minute 62-naah an goal hnihna a khung - tun season inelna hrang hrangah match 14 khelin goal riat a khungna a ni.

Kum 23 mi forward hian assist vawi nga a nei bawk a, Champions League bikah match thum aṭanga goal hnih khungin assist vawi hneih a nei tel bawk.

Atletico-in goal khung tumin an nawr nasa a, mahse, a pawimawh ber goal an hlawh chhuak thei lo - minute 76-naah penalty an hlawh chhuak a, mahse, hei pawh an chhuih goal thei chuang lo.

Madrid khaw club tan hian tun season-a a vawi hnih nana bul ṭantu Antoine Griezmann chuan penalty hi a pet a, mahse, French forward hian bar pet per nan a hmang.

Atletico hian an match hmasa bera 2-1 a FC Porto an hneh hnuah khan Bayer Leverkusen (2-0) leh Club Brugge (2-0) an ngam lo a, point thum chiah nei chungin group B-ah table mawngphah an luah - mak takin Club Brugge an la chak vek thung a, last 16 an hnaih ta hle.

Hetihlai hian Atletico lawmna turin Porto chuan group B inkhel dangah Bayer Leverkusen chu 2-0 in an hneh a, Zaidu Sanusi leh Galeno ten goal khat ve ve an khung - German club defender Jeremie Frimpong chu minute 88-naah hnawhchhuah a ni bawk.

Stoke City leh West Brom tan pawha lo khel tawh Carl Hoefkens-a enkawl Club Brugge-in hma an hruai laiin, Porto, Leverkusen leh Atletico te hian point thum ṭheuh an nei thung.