Chak result nen champion-in hmawr an bawk

Kum 30 hnua a vawi khat nan league-ah Liverpool an champion a, Premier League nomawi an chawi vawi khatna a ni bawk–Pathianni zanah an league match tawp ber khel turin Newcastle United an lenchilh a, St James’ Park-ah 3-1 a hnehna changin a hmawr an bawk.

Liverpool boss Jurgen Klopp-a'n rin loh takin team a siksawi a, tlarhmaa a chhuanvawr Mohamed Salah, Roberto Firmino leh Sadio Mane te bench-ah a dah. Tlarhnung lamah pawh Trent Alexander-Arnold chu bench lamah hun a hmantir a, rawlthar ṭhangduang Neco Williams chuan bul a ṭan.

Russian club Zenit St Petersburg-a chhuak tur anga sawi Dejan Lovren leh Brighton & Hove Albion-a kum thum khel tura inbiakna kalpuitu Adam Lallana-te chu squad-ah pawh an awm lo. Jurgen Klopp-a'n Lallana a chhuak dawn tih a chian khan a player hma hun a 'risk' duh loh thu a sawi a, free transfer-a chhuak tur a nih tawh avangin inhliam palh se club a hmuh loh mai a hlauhthawnpui. German coach hi a thusawiah a ding nghet a, Reds fan-ten Liverpool jersey ha chunga Lovren leh Lallana inlan lai an hmu tawh dawn lo.

St James’ Park-ah Liverpool an inring hman lo–inkhel ṭanna ham rik a ri fel hman awrh tihin Dwight Gayle chuan mualneitu team tan a rawn khung nghal a, an ṭhat dan bera khel lo Liverpool an hawihai. Mahse, hun a kal a, champion zia a lang–Alex Oxlade-Chamberlain hnen aṭanga a ball hmuh chu Virgil van Dijk-a'n Reds si phurh sut nan a hmang a, Liverpool chhuahsan tur anga sawi Divock Origi chuan minute 59-naah a belhchhah. Klopp-a'n 2-1 leka chak a duh lo a, minute 64-naah a chhuanvawr pathum Firmino, Salah leh Mane te a rualin a luhtir–Mane-a'n goal khat a rawn keng tel a, hun tawp nan minute khat chauh a awm tawh tihin a khung belh. Hun a tawp a, 3-1 in champion team an chak.