Spanish milian an tawlh thlu Copa del Rey aṭanga petchhuah Real & Barca

Ningani zan khan Spanish football-ah result mak danglam a thleng a, Real Madrid leh Barcelona chu Copa del Rey 

aṭanga petchhuah an ni!

Copa del Rey quarterfinal-ah Real Madrid chuan 4-3 in Real Sociedad an ngam lo a, Zinedine Zidane-a'n match 190 chuang a kaihhruai tawha Real-in goal li an chhuah hmasak ber a ni hial. 

Barcelona-in Athletic Bilbao mualah hnehna chang zo bik loin 1-0 in an tlawm a, coach Quique Setien chuan, "Kan chak lo a ni mai a, hmasawn kan ngaihnaah erawh hma kan sawn," tiin thiamthu a sawi. 

Champion lai Valencia chuan Nilaini zan khan Granada chu 2-1 in an lo ngam lo ve tawh bawk a, nomawi humhim an beiseina chu a thamral. 

Villarreal chuan second division club Mirandes chu 4-2 in an ngam lo ve bawk a, club lian Real leh Barcelona tlawm zanah chak tura ngaih team dang an chak bik lo. 

An duh loh kha...

Spanish football ngaina chuan Martin Odegaard an hria ang. Norwegian midfielder hi kum 15 mi lek a nih laia Real Madrid-in an lakluh kha a ni a, Sociedad lamah kum hnih chhung atan loan-a chhuahtir a ni. 

Minute 22-na lekah Odegaard hian chhawr tlaka la ngai lotu Real lamah goal hmahruai a khung a, Alexander Isak chuan second half-ah goal hnih a rawn khung ve zui - acrobatic kick hmanga a khung phei chu goal mawi bik a tling. 

Real hian minute 59-naa Marcelo goal hmangin beiseina thar nei ve leh mah se goal hnih khungtu Isak-a assist hmangin Mikel Merino chuan a khung ve leh a, 4-1 a ni. 

Minute 80 hnuah Rodrygo leh Nacho ten Real tan an khung leh a, hun pek belh minute nganaah Sociedad right back Andoni Gorosabel hnawhchhuah a ni bawk - Real tan 'comeback' puitlinna tur erawhin a tlai vek tawh.

Catalan club buainain zia lam a pan thei lo. Coach Ernesto Valverde an ban hnuah sporting director Eric Abidal leh an thiampuipa Lionel Messi inkarah 'khi' a awm a, players tam zawkin Messi an ṭan. 

Khelmualah tal Barca fan-ten hlimna hmuh an beisei a, an thil hmuh erawh Spanish Cup quarterfinal aṭanga petchhuah an nih lai a ni - Inaki Williams chuan Bilbao tan inkhela goal awmchhun a khung a, Barca an nil. 

Barcelona captain Lionel Messi chuan goal khung theihna remchang a nei a, mahse Argentine forward hian ṭum danga a khung ṭhinnaah Athletic goalkeeper Unai Simon a paltlang thei tlat lo. 

Real an tlak hnuah Barca an tla a, kum 2010 hnua a vawi khat nan Barcelona leh Real Madrid tel loin Copa del Rey final khelh a ni dawn tihna a ni. 

Real leh Barcelona-in semifinal lut ni se an tan kalkawng a awlsam tur a ni a, mahse hnehna an chan miau loh avangin Spanish Cup-ah rin loh tak champion hmu tura inpeih a ṭul. 

Second division table lama 11-na ni pha ṭawk Mirandes-in Villarreal an hneh 'mial' hi thilmak a tling a, goal li an khung avangin vanneia chhiar chi an ni lo tih a lang.  

Mipui 35,000 awmna khawpuia innghat club tan Matheus Aias, Martin Merquelanz (penalty), Odei Onaindia leh Antonio Sanchez ten goal khat ṭheuh an khung a, Yellow Submarine tan Javier Ontiveros leh Santi Cazorla (penalty) ten an khung thung.

 

Roberto Soldado chuan hming a lo chher tawhna Valencia lakah Granada tan goal hnih a khung a, Rodrigo goal khung chu champion lai chhan chhuak turin a tawk zo lo. 

La Liga hmahruaitu Real Madrid-in Pathianni zan dar 8:30-ah league match khel turin Osasuna an lenchilh dawn a, Barca aia an sanna hi point thum chauh a nih avangin fimkhur a ngai hle. 

Barcelona hian coach thar Setien-a team hlui Real Betis chu Pathianni zan dar 1:30 hian khualmualah an lenchilh dawn a, an coach hlui lo ngam hi Betis tan thil châkawm a ni ang. 

Real leh Barca-in Copa del Rey an mangṭha hmaa petchhuah lo ni tawh Atletico Madrid chu zanin dar 1:30-ah an inlan dawn a, Valencia ngamtu Granada an mikhual dawn avangin fimkhur a ṭul.

Atletico hian season duhawm lo tak hmangin table-ah parukna an ni mek a, Diego Simeone-a naute tan champion ai chuan season thara Champions League khelh chu rilru kaptu tur a ni ang. 

Hei hi chu thil thleng ve 

ṭhin reng a ni. A chang chuan chance kan neih chhunah goal kan khung mai a, a chang chuan vawi sawm ngawt chance neih pawhin a tawk zo chuang lo. 

Sawisel tur lai ka hrethiam lo. Goal rawn luhna kha hlauhawmah pawh kan ngaih loh a ni a, mahse khatiang kha hriatthiam theih loh game-a thleng ve ṭhin thil a ni miau si. 

Zep ka tum lo. Kan tlawm avangin ka rilru a na a, tumahin a tlawm zawk nih hi an duh ngai lo. 4-1 ngawta kan hnufual chungin theihtawp kan chhuah a, mahse kan tlin ta lo a ni. 

Sociedad lawmpui hi kan tih mai tur chu a ni a, kan tlawm a ni tih hi kan pawm  a ngai bawk.