Tottenham : Poch leh Mourinho

Season hlui kan thlir kir chuan Mauricio Pochettino enkawl Tottenham-in Champions League final an thleng a, Premier League-ah palina an ni a, League Cup-ah semifinal an thleng bawk. London club hi league-ah palinaah niin season an khar bawk avangin Tottenham-ah Argentina manager Poch hi khawih chet thiang lo a tih theih.

Amaherawhchu 2019-20 season-ah chanchin a danglam ta. Spurs midfielder Christian Eriksen chuan chhuah duhin kawhmawh a bawl reng a, stadium thar an hmang thiam lo bawk nen Tottenham-in kawng hrang hrangin beisei an pha lo a ni ber. Poch-a hnuaiah London club-in league match 12 a khel hman a, vawi thum chauh chakin vawi li an chak lo. 

Tottenham-in November 19-ah chuan thutlukna mak tak siamin Pochettino an ban ta a, hetihlai hian Spurs hi league-ah 14-naah awmin point 14 an hmu. Chutihrualin table bih nawn erawh chuan Spurs hian hetihlaia pangana Sheffield United an phak lohna hi point thum chauh a ni!

Jose Mourinho a rawn lang a, Tottenham dang an ni ta. Portuguese manager hnuaiah Spurs hian match 26 khelin vawi 13 an chak a, point 45 an hmu a, Poch-a hnuaiah point 14 an hmuh nen point 59 hmuin season tharah Europa League an khel ang.