Cristiano Ronaldo leh Lionel Messi ten World Cup khel dawn
European champion Portugal chuan an qualifier match hnuhnung berah an mikhual Switzerland chu 2-0 in an hneh. Cristiano Ronaldo te ram hian point 27 hmuin Swiss nen an point hmuh zat inang mah se goal difference an neih ṭhat zawk avangin hmahruaitu an ni a, playoff khelh an ngai dawn lo.
Lisbon-a inkhelah Portugal hian hnehna chang lo chi ni se playoff an khelh a ngai dawn, amaherawhchu Arsenal defender hlui Johan Djourou-a'n anmahni lamah a tih luh bakah AC Milan striker Andre Silva chuan goal khungin 2-0 in hnehna an chang
Portugal captain Ronaldo-a'n hun tawp lamah an goal thumna khung theihna hun ṭha nei mah se a chhawr ṭangkai thei lo. Real Madrid forward hian tun qualifier-ah hian goal 15 a khung a, an ram goal khung zawng zawng (32 goals) zat ve a tling pha teuh hle.
Europe ram 54 ten World Cup qualifier an khel a, group tina a sang ber te chu Russia pan turin an tling nghal. Group pakua zinga pahnihna pariatte chuan playoff an khel dawn thung. Playoff khel tur hian group tina pahnihna ṭheuh chu anmahni group-a a hniam ber an tum ṭuma an point hmuh paih sak an nih hnua an point la neih aṭanga tehin a sang pariat an tling a, team khat vanduai chu Group F pahnihna Slovakia an ni.
October 17 hian playoff-a intum tur hi pawh a ni dawn a, November thlaah an khel zui ang.
An ramin point thum hmuh an ngai a, a chhanna chu Lionel Messi a ni. Goal an mamawh hunah pawh mamawh chhan chu Messi tho a ni. Messi chuan Ecuador laka a hattrick hmangin Argentina chu FIFA World Cup 2018 khel turin a hruai kai.
Nimin zing khan South America ram tan qualifier match hnuhnung ber an khel a, Argentina hian khualmualah Ecuador 3-1 in an hneh a, hmahruaitu Brazil chuan Chile beiseina tihtawp sakin 3-0 in an sawp. Copa America champion zawn thei Chile-in Confederation Cup an khelhna hmun Russia an pan ve dawn lo.
Hello World Cup
A sang pali tan direct ticket a awm a, pangana tan playoff khelh a ngai. Match hnuhnung ber an khelh hmain Argentina hi parukna an ni a, an dinhmun a him lo, point hloh chu ram mipui hmelma nih theihna a ni ber a - kum 1970 hnua World Cup khel thei lo dinhmunah an ding hman a ni.
Estadio Olimpico Atahualpa, Quito-a inkhelah ṭan aṭanga second 37-na lekah Ecuador midfielder Romario Ibarra chuan goal hmahruai a khung! Argentina-in qualifier bika an goal chhuah ran ber hian South America khawmualpui a sawi nghing dawt. Quito-ah hian kum 2001 hnuah Argentina hian hnehna an la chang ngai lo a, an dinhmun a chhe tawh takzet.
Brazil, Chile, Uruguay, Colombia leh Peru te dinhmun ṭhaah an ding thung a, Argentina tan hmun a awm rih lo. Amaherawhchu, world champion vawi hnih ni tawh Argentina hian an elpui ram dangten an neih loh Lionel Messi an nei a, huaisen takin an bei let.
Barcelona forward hian minute 12-naah Real Madrid winger hlui Angel di Maria siamsak hmangin an si phurh a sut a, minute riat bak a liam hman lo - Messi hian box sir
aṭangin kawh zetin an hmahruaina goal a hlap lut. Dinhmun hima an ram a dah hnuah Messi-a'n a la duh tawk mai lo, second half-ah solo goal ropui khungin an chak a nemnghet.
A hming chu Messi
Argentina head coach Jorge Sampaoli-a'n Peru nen goal khung lo an an inhnehtawk hnuah World Cup khel tura an tlin ngei a rin ngheh tlat thu a sawi a, Sevilla manager hian huaisen taka a ngaihdan a kaltlang pui ngam a vangin an tum ram hmasa an thleng.
Juventus forward Paulo Dybala leh Messi te a khelh duntir rih loh tur thu a sawi lawk a, Inter Milan captain Mauro Icardi pawh bench lamah a dah; Argentine manager hian Messi kiangah hming langsar aiin a langsar lo zawk dah a thlang - Messi hi a duhtawka che tura zalenna pek a duh vang a ni.
Jorge Sampaoli chuan, "Messi hian World Cup khel tura Argentina tlin pui hi a bat a ni lo a, football hian World Cup khel turin Messi hi a mamawh a ni zawk. Inelna lian kan hmachhawn hunah pawh a ṭha thei ang bera a khelh theih nan kan pui ang, squad-ah ani kan nei hi ka lawm takzet," tiin Messi chu a dah sang vet vet hle.
Kum 30 mi Messi hian Argentina tan match 122 a khelhah goal 61 a khung tawh a, ram tana goal khung hnem ber a ni. Copa America final vawi hnih khel tawhin 2014 World Cup-ah khan final an lut bawk. Messi hian Russia-ah an ram a hlawhtlin pui a nih ngat player tinin an duhthusam zawng chu a nei kim vek ang.
Chile an thamral
A zawna Copa America champion vawi hnih ni thei Chile-in Russia pan turin point khat tal an hmuh belh loh chuan an dinhmun a him lo tih hre chungin Brazil an pan a, world champion vawi nga ni tawh Brazil hian an mikhual lakah ṭhat an chhuah ngawt lo - Tite naute hian 3-0 a hnehna changin Chile beiseina an tihtawp sak.
Brazil-in Paulinho leh Gabriel Jesus te goal hmangin si hnih faiin Chile lakah hma an hruai a, 2-0 a nih lai hian Peru chuan Colombia lakah goal khat an phur a, Copa America champion hian playoff khel thei dinhmunah an ding.
Amaherawhchu, minute 76-naah Peru hian Paolo Guerrero hmangin an siphurh an sut a, Colombia nen 1-1 in an inhnehtawk. Chile leh Peru in point 26 ve ve an hmu chiah a, goal difference-a goal khata chungnung Peru dinhmun a ṭha zawk.
Playoff khelh phak ngei tumin Arsenal forward Alexis Sanchez te ram Chile-in hun tawp dawnah goal khung tumin Brazil an nawr a, goalkeeper Claudio Bravo thlengin an tlan chhuak. Amaherawhchu an goal nawr nasat rah sengin Chile-in goal khung loin goal an chhuah a, Jesus-a'n Brazil goal thumna a khung. World Cup hnuhnung pahniha last 16 lut thei ram Chile-in World Cup an khel dawn lo.
Inkhel dangah Colombia leh Peru te goal khat ve ve pein inkhel a tawp a, Colombia hi an tling nghal a, pangana dinhmun hauhtu Peru-in New Zealand nen playoff an khel thung ang.
Chile coach Juan Antonio Pizzi-a'n a hna a bansan zui nghal tur thu a tichiang a, hetih lai hian Brazil coasch Tite erawhin nakkuma World Cup an khelh hunah champion tura rinkai an nih thu a sawi.
Tling Playoff
tawhte khel tur
France Switzerland
Portugal Italy
Germany Denmark
Serbia Croatia
Poland Sweden
England N Ireland
Spain Greece
Belgium Rep of Ireland
Iceland
Inkhel Results
Paraguay 0 - 1 Venezuela
Brazil 3 - 0 Chile
Ecuador 1 - 3 Argentina
Peru 1 - 1 Colombia
Uruguay 4 - 2 Bolivia
Team Dinhmun
# Team Pld W D L GF GA GD Pts
1 Brazil 18 12 5 1 41 11 30 41
2 Uruguay 18 9 4 5 32 20 12 31
3 Argentina 18 7 7 4 19 16 3 28
4 Colombia 18 7 6 5 21 19 2 27
5 Peru 18 7 5 6 27 26 1 26
6 Chile 18 8 2 8 26 27 -1 26
7 Paraguay 18 7 3 8 19 25 -6 24
8 Ecuador 18 6 2 10 26 29 -3 20
9 Bolivia 18 4 2 12 16 38 -22 14
10 Venezuela 18 2 6 10 19 35 -16 12