United hmachhawn lo tur Mane

Inrinni zanah Liverpool-in Manchester United an mikhual dawn a, Premier League game pawimawhah Reds forward chhuanvawr Sadio Mane a inlan thei dawn lo. Senegal international hi ram tan World Cup qualifier-ah a inlan a, Cape Verde 2-0 a an hnehna inkhelah a inhliam a ni.

Tun season-a league match nga a khelha goal thum khung tawh Mane hian Manchester United, Tottenham Hotspur leh Champions League match hniha Maribor an hmachhawn hunah a hmel a lan thei dawn lo a, kar ruk vel chu a chawlh a ngai dawn tihna a ni - World Cup qualifier match pawimawhah South Africa a hmachhawn thei dawn lo bawk.

Mane hi season ṭantirh khan Man­chester City laka 5-0 a an tlawm ṭumin hnawhchhuah a ni a, match thum lai hrem a lo ni tawh. Kumin January khan Africa Cup of Nations a khelh laiin Reds-in match sarihah vawi khat chiah hnehna an chang thei.

Kartawp Liverpool leh United inkhel turah Old Trafford damdawi in a ruak bik lo. Manchester United midfielder Marouane Fellaini chu Belgium tana a inlannaah a inhliam avangin kar engemaw zat a chawl dawn bawk a, September 12-a inhliam Paul Pogba dinhmun a la chiang lo bawk.