US tan hmun a awm ve lo

United States chu nakkum FIFA World Cup-ah an hmel kan hmu ve dawn lo. Nimin zing khan US hi table mawngphaha awm Trinidad & Tobago nen an inkhel a, khualmualah 2-1 in an tlawm.

Qualifier inkhel dangah tling chiang tawh Costa Rica chu Panama lakah 2-1 in an tlawm ve bawk a, Mexico leh Costa Rica hnung zuiin Panama hian World Cup an khel dawn - palina Honduras chuan Australia nen playoff an khel thei dawn a ni.

Estadio Rommel Fernández-a inkhelah minute 87-na thleng chuan Costa Rica leh Panama te hi 1-1 in an inhnehtawk, goal dang lut tawh lo ni se chuan US tan Russia ticket neih theih a la ni. Mahse, minute 88-naah Panama defender Roman Torres chuan goal khungin an ram chu a vawi khat nan World Cup a hruai thleng, he goal hian US chu table hnuai lamah a nek thla zui bawk.

Zirtawpni khan US hian Panami hi 4-0 in an hneh thei a, match kua an khelh aṭanga point thum bak hmu lo Trinidad & Tobago hi khingpui huphurhawm tur angin an lang lo.

Mahse, minute 17-na lekah Omar Gonzalez-a'n anmahni lamah a ti lut a, chawlhlawk hma deuhin Alvin Jones chuan yard 35-a hla

aṭangin an goal hnihna a khung bawk - US an talbuai.

Borussia Dortmund rawlthar Christian Pulisic-a'n second half ṭantirah goal mawi khungin an ram US beiseina a siam sak a, hun tawp thlengin goal dang erawh an nei zui thei tawh lo. Kum 1986 hnua a vawi khat nan US hian World Cup an khel phak dawn lo a ni.

US coach Bruce Arena chuan, "Inbuatsaih nan kan mamawh engkim kan nei a, vawiin hian point khat chiah tal pawh hlawh chhuak ni ila chuan kan dinhmun a

ṭha thei. Mahse, kut beng chunga khelmual kan chhuahsan avangin nakkum World Cup chu mahni in aṭanga kan en a ngai dawn a ni. Kan tlin loh hi ka mawhphurna a ni a, player leh ram mipui chungah ngaihdam ka dil," tiin a sawi.