A zawnin Quartararo a chak

Nimin tlai khan Andalucia MotoGP tlan a ni a, season bul ṭan fuh Fabio Quartararo chuan hnehna a chang. Champion lai Marc Marquez erawh a inlan lui thei ta lo a, atan nomawi humhim a harsa sawt dawn.

Yamaha bike khalhtu Quartararo-a'n qualifying a tlan fuh a, Jerez tlankawngah a hmasa ber aṭanga bul ṭanin minute 41 leh second 22.666 chhungin a thleng. Kar hmasa khan Spanish GP-ah hnehna a lo chang tawh bawk.

Spanish GP an tlan ṭumin Marquez a inhliam a, zai a ngai hial. A ban ruh tliak an zai aṭanga ni hnih hnuah Marquez hi a intlansiak theih tur thu sawi a ni a, mahse inelna tak an hmachhawn dawnah Honda boss Alberto Puig chuan 'risk' an lak loh tur thu a sawi a, a rider hi a inlan zui ta lo.

World champion vawi ruk ni tawh Marquez hi August 9-a tlan tur Czech Republic GP-ah chuan inlan thei tawh ngei tura rin a ni. Mahse, inelna hmasa berah a chesual a, a pahnihnaah a inlan thei lo hi a pawi - point a la hmuh loh laiin Quartararo erawhin point 50 a khawl der tawh thung.