World Cup khel lo tur Robben a chawl ta
Netherlands captain Arjen Robben chuan Sweden lakah 2-0 in an ram team chu hnehna chanpui mah se World Cup playoff khel turin an inpet tling zo lo a, he inkhela goal hnih khungtu Robben chuan international football a chawlhsan thu a puang nghal.
Bayern Munich forward Robben chuan, "Thutlukna awlsam tak a ni lo a, mah se kum 33 ka ni tawh tih ngaihtuah tel a ṭul a ni. Tunah chuan club lamah ka rilru zawng zawng ka pe tawh ang," tiin ram leh club tana inkhelh kawp chu a tlin tawh loh thu a sawi.
Netherlands tel lohna
Euro 2016 an khelh loh hnuah Netherlands-in World Cup 2018 pawh an khel dawn lo - Qualifier ṭan tirhah beisei an phak loh avangin coach Danny Blind ban mah se Netherlands FA harhchhuah a tlai a, Blind thlak tura Dick Advocaat an lakluh meuh chuan match a tlem lutuk tawh.
Sunderland boss hlui hian qualifier match ngaah Netherlands hi vawi li ngawt a chakpui thei a, an ngam loh awmchhun hi hmahruaitu France an ni - mahse Advocaat-a'n an ram team a enkawl meuh hi chuan a tlai lutuk tawh qualifier tawp rualin a lang nghal a, an hneh tak Sweden nen an point hmuh zat in ang mah se goal difference-ah an hniam zawk avangin playoff pawh an thleng zo ta lo.
Mangṭha Robben
April 2003-ah Robben-a'n ram tana a match hmasa ber a khel a, ram tan kum 14 chhung a khel tihna a ni. Netherlands tan match 96 khelin goal 37-a a khung a, Dennis Bergkamp nen Dutch team tana goal khung hnem lamah intluk tawkin Robin van Persie (50), Klaas-Jan Huntelaar (42) leh Patrick Kluivert (40) te an tluk lo.
Robben-a'n Netherlands tana a khelh chhungin assist 29 a nei bawk a, April 2003-a ram tana a inlan hnuah ani aia assist ngah zawk awmchhun chu Wesley Sneijder (33 assist, 132 games) chiah a ni. Robben hian Netherlands tan World Cup-ah goal ruk a khung a, kum 2010-ah final luhpuiin kum 2014-ah pathumna an ni. Kum 2014-ah phei hi chuan FIFA World Cup All-Star Team-ah hial a lang phak.
Mangṭha Netherlands
Robben-a'n ram tana a match hnuhnung berah goal hnih a la khung cheu a, goal pakhat zawk hi penalty hmanga a khung a ni. Chelsea leh Real Madrid tan pawha lo khel tawh forward chuan, "He ram tan hian kum 14 tehmeuh ka khel a, ka tan chuan hun hlimawm leh hlu tak a ni. Thil ropui tak tak ka tawng ṭheuh a, Dutch fan-ten ka hnathawh ve te kha an ngaihlu a nih chuan kei chu ka lawm a ni mai,"a ti.
PSV, Chelsea, Real leh Bayern-te league-a champion pui vek theitu forward chuan, "Thil ropui hlawh chhuak tura i theihna zawng zawng i pek hnua i chak zo lo a nih chuan lungngaih chu dan pangngai tur a ni. Mahse, he team hi hmabak êng takin a hmuak mek a ni," tiin Netherlands chu a mangṭha.
Robben thlahtu Advocaat
Dutch boss Advocaat chuan, "Arjen hi khawvela player ṭha ber pawl a la ni reng a, club-ah pawh a hna ṭha takin a la thawk reng a ni," a ti a, a player-in international football a chawlhsan mai tur chu a ui thu a sawi.
A hma hun chiang bik lo anga an sawi coach chuan sawi chhunzawmin, "Netherlands chuan Robben hi kan ngai dawn hle tihah inhnialna tur a awm lo. Player theihna nei sang tak a nih avangin a tel lo chuan kan team hi a kim dawn lo a, a hmunruak hnawhkhah a har dawn a ni," tiin an legend a thlah liam.