Chelsea an chak ve ta
Thomas Tuchel an ban chhan kha Dinamo Zagreb an hneh loh vang a ni a, a hnua Champions League an khelh lehna hmasaah RB Salzburg nen an inhnehtawk, team lian lo zawk lak aṭangin point khat chiah an nei a nih kha.
Tunah chuan, an group awmna huanga anmahni elphak ber tur AC Milan an mikhual a, London club hian 3-0 in an sawp. Graham Potter tan UCL bika a naute a chakpui vawi khatna a ni a, tun season atan an chakna hmasa ber a ni bawk.
Group match vawi thum an khelh aṭangin Blues hian point li an nei a, an hneh tak Milan nen an point neih zat a inang. Point nga neitu Salzsburg chuan hma an hruai a, khelh hmabak pathum an la neih avangin tlang tur sawi thiam a la harsa angreng hle.
Chelsea hmel thar
Kepa Arrizabalaga-a'n si ban a nghak a, a hmaah defender man tam Wesley Fofana leh tawnhriat nei ṭha Thiago Silva leh Kalidou Koulibaly te an inkawp. A sirah English wingback pahnih Ben Chilwell leh Reece James te an awm.
Milan lakah Chelsea hian an ṭhat dan berin tlarhnung an rem theia ngaih a ni, Leicester City aṭanga an lakluh Fofana hian goal hmahruai a khung a, a khel chhe lo - hliam vanga thlak a ngai erawh Blues fans tan a lawmawm lo ang.
Hliam vangin N'Golo Kante a la inkhel thei lo. Manager Potter-a'n midfield laiah Ruben Loftus-Cheek leh Mateo Kovacic te a inkawptir a, striker Pierre-Emerick Aubameyang chu Mason Mount leh Raheem Sterling ten an thlawp thung a ni.
Midfield tak hi chu Kante a awm loh avangin an duh ang takin an la inrem lo deuhin a rinawm, tawnhriat nei ngah Jorginho pawhin khelhna hmun chang turin a beih a ngai tih a chiang a, midfielder zingah khel chiang sa an awm rih meuh lo.
Danglamna James
Hnehna an chang hi Graham Potter tan thil lawmawm a ni a, point thum phenah hian thil lawmawm dang a tam. Season bul ṭan fuh lo Chelsea-in nghet takin an khel thei a, goal an khung hnem bakah an tlarhnung a phui viau.
Buai nuaih karah Fofana-a'n a khung zeuh a, chawlhlawk hma deuhin Milan midfielder Rade Krunic-a'n sut theihna remchang nei mah se a vanduai, hnai takah goal ruakah a khung ṭhelh tia sawi theih a ni.
Chawlhlawk zawh hnu lawkah James-a'n Auba tan a cross, a awmna tur hmun dika awm Arsenal striker hlui hian a khung. English wing back hian Sterling ball pek naran nia lang chu la hnaiin angle zim tak aṭangin ṭha zetin a khung, chak a nemnghet nghal.
Inkhelh bana sawi zui hlawh chu James a ni. Tlarhnung a veng ṭhain a hma lam a pui nasa, striker Auba khung tur a siamsak leh aman a khung bawk avangin fak a phu, a phu ang ngeiin 'Man of the Match' atan an thlang zui bawk.
Fofana a hliam
Pound maktaduai 70 man a ni a, kumin tir lamah hliam na tak a tuar. Wesley Fofana-a'n a club thar Chelsea tan hmun pawimawh a chang chho dawn a, mahse minute 38-na lekah khup hliam vanga thlak a ngai, a hmun ruakah Nathaniel Chalobah a rawn lut.
Chelsea manager Potter chuan, "Tun ṭum match bikah chuan Wesley Fofana inhliam kha thil lawmawm lo a ni hial ang. A inkhel zui thei lo a, a na tih chu a hriat theih. Mahse, engtiang taka na nge a nih chu endik hnuah a hriat chauh ang.
"Player naupang leh huaisen tak a ni a, a lo kir leh thuai theih nan theihtawp kan chhuahpui ang," tiin a sawi a, hnehna an chan bakah a nauten an khelh ṭhat em avangin a lawm thu a sawi tel a, a bik takin James a fak bawk.
Chelsea hian Inrinni zan hian Stamford Bridge-ah Wolves an mikhual zui leh nghal dawn. Fofana a inlan dawn lo tih a sawi ngam a, 6ft 2in a sang Chalobah tan tlarhnung laia khelh theihna remchang a inhawng ve leh thung ang.