Haaland leh Man City an ropui zel

Manchester City-in Premier League ang thoin Champions League lamah pawh goal khung an uar a, Nilaini zan khan Copenhagen hmachhawnin 5-0 in an sawp. Erling Haaland-a'n minute 45 chauh a khel chungin goal hnih a khung hman a, Copenhagen defender David Khocholava-a'n an lama a tih luh bakah Riyad Mahrez leh Julian Alvarez ten second half-ah an khung belh.

Kum 22 mi Haaland hi a release clause-ah kum 2024-a Real Madrid zawm theihna a awm tih thuthang a awm a, Spanish club hi an ropui em avangin thuthang hi thil ni thei tak a ni.

Mahse, City boss Pep Guardiola chuan, "Thu dik lo a ni. Real Madrid emaw team dang zawm theihna thuthlung a awm lo. Thuthang hi chu kan tih theih bak a ni a, keini chuan lo ngaihven loh mai hi a finthlak," tiin a sawi.

Haaland hian City a zawm hnuah match 12 khel tawhin goal 19 a khung tawh a, a record hi a ropui hle. Jack Grealish chuan inkhelh banah, "Keeper khan ka bulah 'mihring pawh a ni lo' tiin a sawi hial. Dik taka sawi chuan a awihawm lo zawk. Hetiang anga goal khung thei hi ka la hmu lo," tiin Haaland a fak.

Group G inkhel dangah Borussia Dortmund-in khualmualah Sevilla 4-1 in an sawp. German club tan Raphael Guerreiro, Jude Bellingham, Karim Adeyemi leh Julian Brandt ten goal khat ṭheuh an khung. 3-0 a nih tawh hnuah Sevilla-in Youssef En-Nesyri hmangin siphurh sut ṭhen mah se mualphona a hliah khuh zo lo.

Man City-in point kua an hmuh tawh avangin knockout stage an luh ngei a rinawm tawh a, Dortmund-in point ruk an hmuh tawh avangin an dinhmun a ṭha viau bawk.