PSG tan Messi goal a tawk lo

Lionel Messi-a'n goal mawi khung mah se Paris St-Germain chak nan a tawk zo lo. French champion hi Nilaini zan Champions League inkhelah Benfica nen 1-1 in an inhnehtawk a, defender Danilo Pereira chuan anmahni lamah a ti lut.

Inkhel dangah Juventus chuan Maccabi Haifa 3-1 in an hneh. Old Lady hian kumin UCL bika a vawi khat nan hnehna an chang a, winger Angel Di Maria chuan Adrien Rabiot goal hnih leh Dusan Vlahovic khung tur a siamsak.

Group H hmahruaitu nih inchuh a hmuhnawm, minute 22-naah Messi a inlar. Argentina captain hian mual laia a ball chan chu a hmaa awm Kylian Mbappe a pe, ani hian a ke ding lama a ball dawn chu vei lamin Neymar a pe nghal.

Neymar hian lo chelh ding loin Messi tan a pe thla nghal a, forward ṭha mi Messi-a'n box pawn deuh aṭangin laklawh nei miah loin a pet kum lut nghal - goal luh theih nana PSG tlarhma player pathum ball inpe kual a hmuhnawm hle.

Barcelona captain hlui hian Champions League-ah team hrang hrang 40 zetah goal a khung ta a, club hrang laka goal khung hnem ber a ni. Mellung pawimawh phun mah se Danilo-a'n anmahni lamah a ti lut miau a, point thum hmuh nan a tawk zo lo.

Second half-ah Neymar leh Achraf Hakim ten remchang an nei a, mahse keeper Odysseas Vlachodimos a chesual duh lo. Benfica defender Nicolas Otamendi pawhin yard ruk leka hla aṭangin a tauh lut lo, goal pawnah a kal.

PSG manager Christophe Galtier chuan, "Benfica khan an khel ṭha hle, goal hlauhawm pawh an rawn nei lo - Gianluigi Donnarumma zarah kan him ti ila kan sawisual lo ang, an khelmual a nih bawk avangin a awlsam lo ve bawk.

"Kan khingpui khel ṭha mah se team ṭha zawk chu kan ni. Match zawng zawngah duhthusam result neih vek theih a ni lo, tunah chuan kartawpa league match kan khelh tur atan rilru kan seng leh phawt ang," tiin a sawi.