Mizo rawlthar telna India chak leh ta

India Under-17 captain Vanlalpeka Guite hoin India an chak leh ta - Blue Tigers hian Thawhlehni zan khan AFC Under-17 Asian Cup 2023 qualification-ah Kuwait chu 3-0 in an hneh.

India tan hian Thanglalsoun Gangte chuan goal hnih a khung a, Korou Singh chuan goal khat a khung ve bawk - India hian an match hmasa berah Maldives chu 5-0 in an lo sawp tawh bawk a, an dinhmun a ṭha ta hle.

Blue Tigers tan captain Sente-a'n goal khungna remchang nei mah se a chhawr thei lo a, chutihrual chuan minute 66-naa Korou-a goal khung tur erawh a siamsak tho a ni a, Sentea che velin mit a titlai ṭhin.

Bawngkawn rawlthar Lalpekhlua pawhin goal khung theihna remchang vawi hnih ngawt nei mah se a vanneih zan a ni lo a, Thanglalsoun-a goal hnihna tur chu a siamsak a ni thung - Maldives laka goal ropui khungtu Lalhmingchhuanga Fanai chuan inkhel bul a ṭan lo a, bench aṭanga luhtir a ni.

Khawzawl rawlthar Sentea chuan, "Chak inringsain kan khel a, mahse, midfield-ah an inhnawhkhawm ṭhat em avangin kan ti hleithei lo. Mahse, rin ai takin goal kan khung thei a, kan chak ta a ni," tiin Vanglaini a hrilh a, a uang duh lo.

India hian zanin dar 8:45-ah Myanmar an hmachhawn leh dawn a, chak tura beisei an ni - Indian football facebook page lamah live-a en theih tura pekchhuah a ni ang.

Sentea chuan, "Kan huphurh lo a, hnehna chan theih ngei kan inbeisei," a ti a, Myanmar lakah India chakpui a tum - Blue Tigers hian match hnih aṭangin point ruk an nei tawh.