Silly Point ; BER NGHAHLELAWM BER
September kan thlah liam a, kumin chhunga ber thla pathum la awm chu cricket mai ni lo, infiamna khawvel tana kutpui lian inherchhuah hun a ni ti ta ila, kan ziak sual thui kher lo ang.
FIFA World Cup hmanga kum tawp masi boruak kan han khar tur hi chu sawi loha leng a ni a, Weightlifting World Championship te hi Jeremy Lalringnunga te zarah kan bengkhawn fu bawk ang.
Domestic lamah Indian Super League ṭan a ni leh dawn hnai a, chutiang bawkin karleh lam lawka ICC T20 World Cup, Australia lama khelh tur leh India Domestic season 2022/23 bul ṭan an ni fel ta bawk nen, chawm bawk hawp bawkin kumin chu kan khar dawn ni awm tak a ni.
Team Mizoram
Virat Kohli te nasa taka T20 World Cup atan an inpuahchah mek lai hian, Under 19 World Cup champion team-a a ṭhianpa, a hmingpui Taruwar Kohli te pawh Team Mizoram tan inpuahchah a vawrtawp thleng chhoin, Rajkot lamah an ri hut hut tawh.
A hma lama kan thailan tawh angin kumin aṭang chuan team lian leh hlun, Mumbai, Railways etc te zinga rin luh an nih ve tak avangin, result ṭha neih theih loh tluk a ni. Chutichung chuan kei chuan team hluite duhsakna ka hlan a, result pangngai tak an neih ka ring tlat.
Chutihrual chuan India ram hmun tinah, kan semi professional lam hmeichhe team, age-group te pawh an kal darh sang sang tawh. BCCI huang chhunga kum 4/5 vel leh kan awmve chhung hian, kumin bik hi inenfiahna hun ṭha tak, kawng pengṭhuama kan din ṭumte pawh kan ti thei awm e.
Khelmual pawn
Khelmual chhung lama chet velna tur tak takin min hmuak ang bawkin, khelmual pawn lamah pawh BCCI inthlan hun a lo nih mai piah lamah, a hnu lawk Sahmulphah thla chawhma lam hian Cricket Association of Mizoram pawh hruaitu turte inthlan ṭhat a lo hun ta.
Mizoram cricket tana thawh hlawk, a ngaihna hria, hmathlir nei leh min awptute lam hi BCCI an nih miau avangin, khulam zuk dawr thiam leh a dawr dan kaida thiam mi ṭha rualte kan thlang chhuak sang sang thei turah ngai ila.
Professional Sports Organization a nih miau avang hian, NGO leh Kohhran kan lo ṭhan hnan ang ngawt loin, a thlangtu turte pawh hian kan fin ve deuh deuh a ngai awm e. Ziak leh hunah a aia chipchiar leh chiang zawka Mizoram cricket dinhmun ziah kan tum ang.
Hma kan sawn
Hetia retire nun han hman takah chuan, professional ni tura an kailawn hmasa ber, domestic level-a kan nursery Under 16 mipa team-te hi, an head coach leh kan teammate hlui Pu Tetea'n Visiting Mentor ang deuhin min sawm ṭhin. Ṭum hnih khat lek kan inlan ve ṭumin, keini under 16 nih ve lai aia an ṭhat zawk dan leh an advance zia ka hmuhin, coaching staff-te leh CAM lam ka fak lo thei lo.
Skills leh technique lam ai mahin, an u te, an senior an lo zah leh ngaihsan der tena, kan tawnhriat kan han ṭheh te, an thil tawn tur chhuk chho hrang hrang keini lo paltlang tawh an lo hmachhawn dan tur kan han hrilhriatte kha an career kal zel turah kawng hnih khat tala lukhawng a neih ngei erawh ka beisei.
Inthlan kan thailang sek a, keini lam Indian Cricketers Association pawh karleh lam hian term thar hotu turte kan han inthlang ṭha ve leh dawn. A Mizo mai ni lo, India hmarchhak a, palai tlemte tel thei zinga kan han ṭang ve nulh hi vannei ka inti hle.
Mi ropui Kapil Dev-a te, VVS Laxman-a te ho nena palai huang khata awm ve mai tur hi phur tak si, zam ru deuh si hian, Mizoram cricket leh Cricketers tana theihtawpa rawngbawlna rilru nena pen turin ka insehruh ve sauh sauh mai. Silly Point thu leh hla awm leh hma loh zawng, lo him dam vek zel u la.
- K. Vanlalruata