UCL-ah champion lai Real Madrid an chak

Champions League match thum khelh tawh a ni a, Real Madrid chak zat chu match thum a ni - Nilaini zan khan an mikhual Shakhtar Donetsk chu 2-1 in an hneh a, table chung ber an luah mek.

Real tan Rodrygo leh Vinícius Júnior ten goal khat ve ve an khung a, Ukrainian club tan Oleksandr Zubkov chuan goal khat khung ve mah se awmzia a nei phak lo.

Group F inkhel dangah RB Leipzig chuan 3-1 in Celtic an hneh a, German club tan André Silva chuan goal hnih khungin Christopher Nkunku chuan goal khat a khung bawk.

Celtic tan Jota chuan si phurh sut ṭhen mah se scoreline tihmawina chauh a ni - Real-in point kua hmuin hma an hruai mek a, Shakhtar (4 points), RB Leipzig (3) leh Celtic (1) in an dawt.

Real an chak
Carlo Ancelotti enkawlna hnuaiah Real an vul a, tun season inelna hrang hrangah tlawm an la nei lo - mahse, Shakhtar an mikhual hma an league match hnuhnung berah Osasuna chu 1-1 in an inhnehtawkpui a, an mualpho.

Real-in insiamṭhat an mamawh tih an hria a, La Liga-a an chak zawh loh hi Champions League result hmangin an thawi dam - goal khung tur pawhin nghah rei an ngai lo a, minute 13-na lekah Rodrygo chuan goal hmahruai hi a khung.

Nipui transfer-a Liverpool-in an rim, Real Madrid pan thlang ta zawk Aurelien Tchouameni chuan Rodrygo goal khung tur hi a siamsak a, kum 22 mi defensive midfielder hi a khel ṭha takzet.

Minute 28-na a ni a, goal hmahruai khungtu Rodrygo chu goal siamsaktuah a ṭang a, Vinicius-a goal khung tur a siamsak - Vinicius-a'n harsatna nei loin goal-ah a chantir a, tun season inelna hrang hrangah match 11 khelin goal sarih a khungna a ni.

Beiseina thamral
Santiago Bernabeu-ah Real Madrid-in minute 30 a tlin hmain goal hnih an khung der a, harsatna nei loin awlsam takin an chak dawn niin a lang hman - mahse, Shakhtar ngaihdan a dang.

Match hmasa bera 4-1 ngawta Leipzig sawp thei team hian minute 39-naah Zubkov chuan si phurh a sut ṭhen a, Bogdan Mykhaylychenko-a siamsak chu Real tana si ban nghaktu, Ukrainian keeper Andriy Lunin dan hman lohin a tauh lut.

Ram buai avanga mahni rama home match pawh khel thei lo Shakhtar-in beisei aia hmain si phurh sut ṭhen mah se goal dang erawh an khung thei lo a, beiseina chhete an neih chu a thamral zui.

Real hian vawi 36 zet shot neiin, goal zawnah vawi 14 a kal a, tlarhmaah an vannei tawk lo - chutihrual chuan an match hnuhnung pathumah goal an chhuah vek a, tlarhnung insiamṭhat an mamawh.

Beiseina thar
RB Leipzig-in an match hmasa berah rin loh takin Shakhtar an insawptir a, Real lakah an tlawm zui - German club tan last 16 luh beiseina a tlem hman a, fan-te pawh an nguai hman.

Mahse, Celtic lakah an beiseina thi ṭep tawh chu chhem nunin a awm thar leh ta a, goal thum ngawt khung chungin hnehna an chang - Scottish Premiership club-in goal khat bakin an chhanglet thei lo.

Minute 27-naah Nkunku chuan German club tan goal hmahruai a khung a, Portuguese winger Jota-a'n si phurh a rawn sut ṭhen avangin Scottish club-in beiseina an nei leh hman.

Mahse, Celtic tan keeper Joe Hart a chesual a, Leipzig midfielder Dominik Szoboszlai chu ball a pe - Szoboszlai hian Andre Silva tan a siamsak a, Portuguese forward hian goal-ah chantirin, minute 77-naah goal dangin a nem nghet zui a, Leipzig-in last 16 luh beiseina an nei thar ve leh ta.