Serie A pahnihnaah Inter Milan an awm
Inrinni zan Serie A inkhelah Inter Milan chuan Genoa 3-0 in an luhchhuah a, point 76 hmuin table-ah pahnihna dinhmun an luah - Antonio Conte naute hian hmahruaitu Juventus an phak lohna chu point li chauh a ni.
Mahse, Inter an chak lai hian 'mahse' tia sawi zawm a ngai. Nizan khan champion lai Juventus chuan Sampdoria an mikhual a, Italian champion hian point thum an hmuh belh a nih chuan a zawna a vawi kua nan league champion an ni ang.
Serie A aṭang hian Juventus, Inter Milan, Atalanta leh Lazio ten season tharah Champions League an khel dawn tih a chiang tawh. Spal leh Brescia te an tla chiang tawh bawk a, Lecce tan him turin Genoa an chetsual tel a ngai tawh bawk.
Inter an chak
Striker palian Romelu Lukaku-a'n goal hnih a khung bakah forward Alexis Sanchez chuan goal khat khung ve bawkin nuamsa takin hnehna an chang. Chak lo Genoa chu tlak hlauhthawnawm ah an awm chhunzawm.
Antonio Conte chuan, "Match 36 khelh tawhah point 76 kan hmu a, goal chhuah tlem ber kan ni bawk. Kan dinhmun hi duhthusam ni chiah lo mah se ka naute hian an ti ṭha thawkhat viau chuan ka hria, hmasawnna tur lai erawh kan la ngah.
"A chang chuan point thum hmuh phu taka kan khelh ṭumin kan hmu lo a, a chang erawh chuan harsa takin kan hlawh chhuak ṭhin thung. Season ṭha tak hmang mah ila a hmawr bawkna leh kan thlen china duhthu a sam loh chang chu thil awm thei a ni," a ti.
Inkhel dang
Serie A inkhel dangah AC Milan leh an mikhual Atalanta te 1-1 in an inhnehtawk. Milan tan Hakan Calhanoglu (14') goal khung chu mikhual lamin chawlhlawk hmain Duvan Zapata (34') hmangin an sut a, goal dang a lut zui lo.
Napoli chuan an mikhual Sassuolo 2-0 in an hneh thung. Inkhel tir lamah Elseid Hysaj (8') chuan goal khungin hun tawp hma chiahin Allan-a'n (90+3') an goal hnihna leh chak nemnghehna ni bawk a khung.
Gennaro Gattuso chuan, "Hun ṭha kan insiam hnem ang ai chuan goal kan khung tlem, tlarhnung phui kan ngaih pawimawh rualin a khung lam kan uar a ngai," a ti. Gattuso naute hian Coppa Italia an chawi tawh bakah Champions League khelh hmabak an la nei.