Fellaini-a'n minute sarih chhungin hattrick siam!

Mizorama football ngainatu zingah Marouane Fellaini hming hre lo kan awm kher lo ang - kum 32 mi midfielder hian Chinese Super League 2020 ṭan leh hnua an match hmasa berah hattrick a siam!

Nimin khan Fellaini khelhna Shandong Luneng chuan Rafael Benitez-a enkawl Dalian Pro chu 3-2 in an hneh a, Luneng goal khung zawng zawng hi Fellaini khung vek a ni. Manchester United midfielder hlui hian minute 79-naah goal a khung ṭan a, minute 86-naah a hattrick hi a puitlin - goal thum khung turin minute sarih bak hun a mamawh lo tihna a ni a, China-ah a vanglai a chen mek. 

Everton-a a hming a chher hnua China lam pantu Fellaini hian season hmasa khan Shandong Luneng tan inelna hrang hrangah match 34-a khel a, goal 13-a khung - March thla khan Covid-19 a kai a, April khan a dam thu a puang a, khelmualah goal hmangin a dam tawh tih a nemnghet. Sum tamna Chinese Super League 2020 hi ruahmanna ang chuan February 22-a khelh ṭana, October 31-a season khar tur a ni. Mahse, Covid-19 vangin an duh hunah bul an ṭan thei lo. 

Inrinni khan league hi khelh ṭan ve theih chauh a ni a, a tawp hun tur sawi lawk theih a ni lo - hmun hnihah chauh league hi khelh a ni bawk a, team 16 chu group hnihah ṭhenin Dalian leh Suzhou khawpuiah an inkhel a ni.