Indian Super League - A hun a thleng dawn ta
India rama football league sang Indian Super League chu zaninah khelh ṭan a ni dawn - Kerala Blasters chuan zanin dar 7:30 hian East Bengal an mikhualin bul an ṭan dawn a ni.
Tun season ISL-ah Mizoram chhuak player 26 ngawtin inelna an hmachhawn dawn a, season hmasa khan Mizoram player 27-in inelna an hmachhawn thung - season hmasa aṭanga tehin pakhatin an kiam.
ISL-a player thawh hnem ber Manipur-in player 37 an nei a, West Bengal-in 31 neiin an dawt a, Mizoramin player 26 thawhin, Kerala-in player 25 an thawh a, Punjab-in 24 an nei bawk.
Professional football-a Mizote hmahruai-tu engemawzatin an ball boot khaiin inkhelh an chawlhsan a, hei hi ISL-a Mizo player kiam chhan langsar a ni a, season hmasaa ISL-a awm player ṭhenkhat khelh tam theihna zawngin I League lamah an insawn bawk.
Chutihrual chuan ISL reserve team squad-ah ringawt pawh Mizoram player engemawzat an awm tih hriat tel a ṭha.
Blasters tan Puitea
Season hmasa ISL-ah Kerala Blasters an che ṭha takzet a, fi nal an luh theih nana player thawhhlawk chu K. Lalṭhathanga (Puitea) a ni a, Bethlehem Vengthlang tlangval hian khaw dang hawi loin, Blasters tan a khelh chhunzawm dawn.
Puitea chuan, "Dubai-ah pre-season tour neiin kan kal a, UAE club ṭha nena inhmachhawn tur ni mah ila, kan zin vek hnuah FIFA-in India a hrek thut a, kan hmachhawn tur club-te nen kan inkhelh theih loh phah. Team tenau zawk kan hmachhawn a ṭul a, hei vang hian duhthusamin kan inbuatsaih thei lo," tiin Vanglaini a hrilh.
Blasters hian coach Ivan Vukomanovic an la kawl a, Puitea'n hmun pawimawh chang leh tura ngaih a ni. Nipui transfer-ah Greece international hlui Dimitrios Diamantakos, Ukrainian midfielder Ivan Kalyuzhnyi leh Australia tana vawi 12 inlan thei Apostolos Giannou te an lalut a, an chhe lo.
Hetihlai hian an hmachhawn tur East Bengal-in India coach hlui Stephen Constantine an lalut thar a, Mizo player Jerry Lalrinzuala leh Lalchungnunga te an lalut a, Brazilian striker Eliandro leh Australian midfi elder Jordan O'Doherty ten en bik an hlawh bawk ang.
An kiam?
ISL hi kum 2014 khan khelh ṭan a ni a, khatihlai khan India rama league sang ber a la ni lo a, ISL nen khelh kawp theih a ni - season hmasa berah hian Mizo player paruk chauh an la awm a, club pawh paruk chauh an la inel.
Kum 2015-ah Mizoram player an pung a, player 10-in inelna an hmachhawn. ISL-ah Mizo player an pung zel a, 2016-ah 14, 2017-ah 16, 2018-ah 20 a ni a, 2019-ah player palia tlahniamin Mizo player 16-in an awm. ISL 2020-21 season-ah Mizoram player an rawn pung hluai a, player 30 ngawtin inelna an hmachhawn. Mahse, season hmasa khan tlahniam lehin, player 27 an ni a, 2022-ah 26 an ni.