Chhinga Veng leh Aizawl FC an inhnehtawk

I League club Aizawl FC leh Chhinga Veng FC ten Khawzawl mipui tan football hmuhnawm an chhawpsak a, goal hnih ve ve an khung bakah an player pakhat ve ve hnawhchhuah an ni bawk.

KzDFA ground, Mualvawmah goal a lut hma hle -inkhel an ṭan chauh a, Chhingcows tan Johny Lalremruata ball pek ṭha chu Lalchhanchhuaha'n (Jerry) minute hnihna lekah goal-ah a chantir nghal.

Chhinga Veng an phur chhunzawm a, vei lam aṭanga cross ball chu Aizawl FC defender-in clear ṭha tawk loin Silvana R. Lalruatkima'n chiang zetin minute 13-naah a volley goal.

Chhinga Vengin Khawzawl an kal hma hian match nga khel tawhin match liah goal an chhuah loh avangin hnehna an chan mai a rinawm hle. Amaherawhchu, first half chhung vekin Aizawl FC an insiam ṭha a, Lalmuanawma (Munez) chuan ṭha zetin minute 20-naah a tauh lut.

Aizawl FC an khel ṭha chhunzawm a, Chhinga Veng tlarhnung an talbuai. First half tawp hma chiahin Lalramsanga volley chu R. Lalthanmawia'n a tauh per hnuah MS Dawngliana'n a pet goal a, fi rst half-ah 2-2 a ni. Second half-ah team pahnih an innawr chhunzawm a, I League club chungnung hret mah se goal a lut tawh lo.Inkhel boruak a ṭang a, buaina tenau a tam. Injury time-ah Chhinga Veng defender Abel Lalruatfela leh Aizawl FC forward Jakob Vanlalhlimpuia te chu hnawhchhuah an ni.

Chhingcows manager H. Lalremruata chuan, "Min hamtu referee kha a ham apiangah buaina a chhuak duh. A bul ṭantu a hmu ngai si lo a, Aizawl FC a duhsak mah mah," tiin inkhelh banah a lungawi loh thu a sawi.

Aizawl FC coach Lalrozama Fanai chuan, "Referee-te pawhin tihsual chang an nei a, mihring ve tho an ni. Referee sawisel lo tura pet goal tam zawk nih a pawimawh," tiin a sawi ve bawk.

I League club-in MPL-ah hma an hruai zel a, Chhingcows erawhin hneh lo nei lo mah se pathumnaah an tla thla thung.