Tlai dar 3-ah Chanmari leh Chawnpui

Khawzawla Zote Honda MPL9 inkhel hnuhnung ber tur chu Chanmari FC leh Chawnpui FC te an ni a, tlai dar 3:00-ah KzDFA ground, Mualvawmah an inkhel ang.

Chanmari FC hi MPL-a budget nei sang zinga mi an ni a, vawi hnih an champion tawh bakah rinkai zinga mi an ni ziah. Tun season-ah club legend Rochhingpuia'n a enkawl a, beisei angin season bul ṭan ṭha lo mah se an squad a ṭhat avangin inkhel hmuhnawm pho chhuak thei reng an ni.

Hliam leh damloh vangin Chanmari player zingah Khawzawl zin thei lo an awm a, chung zingah chuan Lalramchullova, H. Lalmuankima, Lalhmunmawia, Lalhriatpuia leh Joseph Lalnunpuia te an tel.

Amaherahawhchu, Chanmari hian goal nawr turin MPL U18 best forward Lalnunzira, F. Lalnuntluanga, K. Rohluahpuia leh C. Lalhunmawia te an kawl a, game hmuhnawm an la chhawp thei dawn.

An khingpui tur Chawnpui FC hian hun rei tak Chanmari captain hna lo chelh tawhtu Lalrinchhana Tochhawng bakah Chanmari champion pui tawhtu Lalsangzuala Hmar te an nei thung. Coach Sanga Hmar hi Mizo coach sulhnu nei ṭha zinga mi a ni a, a naute a khelhtir dan hi zir tham a tlin avangin Khawzawla football tui chin tan chuan hmaih a thiang lo ang