Electric Veng leh Venghnuai an phur

Zote Honda MPL9-ah vawiin chhun dar 12:00 hian Electric Veng FC leh FC Venghnuai te KzDFA ground, Mualvawmah an inkhel dawn. Venghnuai hi an match hnuhnung bera Mizoram Police hnehtu an ni a, Electric Veng hi FC Bethlehem hnehtu an ni thung a, an phur lai ve ve a ni.

EFC coach Vanlalsawma Colney chuan, "FC Venghnuai hi kan tiatpui club an ni a, kan inkhel tawk ṭhin hle. Khawzawlah hian point thum hmu turin kan kal a, Venghnuai hi hneh ngei kan tum," tiin chak tuma an khelh tur thu a sawi a, an thlenna veng Khawzawl Vengthar chungah lawmthu a sawi bawk.

Electric Veng hian Khawzawl tlangval pahnih Benjamin Lalhriatpuia leh F. Lalchhanchhuaha te an kawl a, defender Benjamin hi bul ṭantu tur zinga mi a ni a, ṭan a hlawh ang.

Venghnuai lamin hrem vangin defender Lalruatfela an la chhawr thei dawn lo a, zin kawnga damlo C. Ngurnuntluanga a khelh theih a rinawm lo bawk. Amaherawhchu ball pet thiam Vanlalthanga a inlan a rinawm a, ani hi player hmuhnawm a tling. Lalrindika Hmar hote hian team game hmuhnawm tak an khel ṭhin a, Electric Veng lakah point thum an beisei ang.