French Cup champion PSG

Paris St-Germain chuan Saint-Etienne 1-0 a hnehin a vawi 13 nan French Cup-ah an champion. Final-a goal awmchhun hi khawvel player manto ber Neymar-a'n minute 14-na leka a khung a ni.

Ligue 1 hnuah French Cup chawi leh mah se PSG lawm a kim lo, forward Kylian Mbappe chu a kerek dinglam hliam vanga lakchhuah a ni. France international hliamtu defender Loic Perrin chu hnawhchhuah a ni bawk.

Covid-19 vangin April thla khan French ramah football tih tawp lailawk vek a ni a, hripui a len hnuah Zirtawpni zana inkhel kha match an neih leh hmasa ber a ni - mipui 80,000 lenna Stade de France chhungah fans 5,000 an pungkhawm.

Thla thum chuang match pangngai an khelh loh hnuah pawh PSG an la hmuhnawm reng. Rawlthar Mbappe-a'n box chhungah chak taka ball a tlanpui hnuah a goal shot chu keeper Jessy Moulin chuan lo dang mah se a per chu Neymar-a'n nuamsa takin a khung.

Minute 31-na a ni a, forward Mbappe bawkin hlauhawm taka a ball tlanpui lai chu defender Perrin-a'n a lo kalh tlu a, a kerek hliam vangin lak chhuah a ngai zui - France international tan season a tawp phah hial mai thei.

Thomas Tuchel-a enkawl Paris St-Germain-in Ligue 1 leh French Cup an la phawt a, League Cup final leh Champions League quarterfinal aṭanga khelh chhunzawm tur an la nei; hmabak hautak an la neih vangin Mbappe an mamawh hle.

Tuchel chuan, "Thil thleng hmutu apiang kha chu kan hlauthawng vek, thil ṭha lo leh nasa zawk a thlen loh hram kan beisei. Endik a nih hnuah a nihna tak a hriat theih ang," a ti. Captain Thiago Silva pawhin an player pawimawh chu a dam leh thuai a beisei thu a sawi bawk.

Mbappe hian season kal laiah PSG tan match 33 a khelh aṭangin goal 29 a khung tawh, kum 21 mi chauh la ni mah se khelmual chhungah a puitlin tawh avangin team innghahna a tling - UCL a khel thei lo a nih chuan Paris club tan channa nasa tak a tling ang.