Mizoram medal beiseina Rebecca leh Kros-i
Mizo hmeichhe boxer pahnih Rebecca Lalinmawii leh Kroshmangaihsangi ten National Games-ah quarterfinal an lut tawh a, hnehna an chang leh a nih chuan a chhe berah bronze medal an la ang.
Muthi nula Rebecca Lalinmawii chuan flyweight (50–52 Kg)-ah Meghalaya aiawh Eva Wanie Marbani chu majority decision (4-1) in a hneh. Rebecca hi October 9, Pathianni tlai dar 3:15 hian Haryana boxer Minakshi nen quarterfinal-ah an inhmachhawn ang.
Rebecca hian boxing-ah hian sulhnu ngaihnawm tak a nei. National Junior 2008-ah bronze medal a la a, National Youth C'ship-ah bronze (2009) leh silver (2010) a la leh bawk. Senior National C'ship-ah pawh Muthi nula hian 2011, 2012, 2013 leh 2014 khan silver medal a la a, kum li chhung vel hna vanga a awl hnuin 2018 leh 2021 khan quarterfinal a thleng leh bawk.
India aiawh pawhin Rebecca hi a lo fehchhuak tawh a, 2013 khan Serbia-ah invitation tournament khelin quarterfinal a thleng a, boxing thiam vang hian SSB-ah hna a nei a ni.
Saron Veng nula Kros Hmangaihsangi hian lightweight-ah Chattisgarh boxer Ku Rajbala chu unanimous decision (5-0) in first round-ah a hneh.
October 9, Pathianni tlai dar 4:30 hian Rinky Sharma (Uttar Pradesh) hnehtu Simranjit Kaur (Punjab) a hmachhawn dawn. Simranjit hi Tokyo Olympics-ah India aiawhin a tel a, World Championships-ah bronze la tawhin Asian Championships-ah silver leh bronze a la tawh bawk.
Kros-i tan tawnhriat ngah zawk Simranjit hneh hi a har dawn. Chutihrualin Saron Veng nula hian record duhawm tak a nei ve tho. Youth C'ship-ah kum 2009 khan silver a la a, Senior National C'ship-ah kum 2011, 2015, 2019 leh 2021 khan bronze medal a la. Kum 2019 khan Open India (International invitation)-ah Kros-i hian India aiawhin bronze a la. Kum 2019 hian Kros-i hian Indo-Tibetan Border Police a zawm.
Mizoram coach B. Lalhriatpuii, Nursery chuan, "Rebecca leh Kros-i te hmachhawn tur hi tawnhriat nei ṭha an ni a, experience nei zawk hmachhawn hian boruak a dang ṭhin. Chutihrualin ka naute chungah hian beiseina sang tak ka nei a, medal min hnek chhuahsak ngei ka beisei a ni," tiin Vanglaini a hrilh.