AIFF hruaituten India U17 tlawh

India rama football thuneitu sang ber AIFF president thar Kalyan Chaubey leh secretary general Dr. Shaji Prabhakaran te chuan, Ningani zan khan India Under-17 team chu Al Khobar, Saudi Arabia-a an thlenna hotel-ah an tlawh.

Chaubey chuan, "Tun hnai match hniha in result avangin ka lawmpui takzet che u a, nangmahni vang hian kan ram mipuite chuan nuam an ti a ni," tiin Indian rawlthar rual hi a hrilh.

India U17 hi AFC Under-17 Asian Cup 2023 qualification khelin Saudi-ah an thang mek a, an match hmasa pahnihah Maldives (5-0) leh Kuwait (3-0) an sawp a, nizan khan Myanmar nen inkhelin, an result kan hre hman lo.

Blue Tigers rawltharte hian Pathianni zan dar 11:30-ah Saudi Arabia an tawng leh dawn a, Asian Cup khel ngei turin an dinhmun a ṭha tawh hle.

India U17-ah hian Khawzawl rawlthar Vanlalpeka Guite chu captain a ni a, Champhai attacking midfielder Lalhmingchhuanga Fanai leh Bawngkawn winger Lalpekhlua te chu squad-ah hian an awm bawk.

AFC U17 Asian Cup 2023 - Qualificatin round
October 3, Thawhṭanni Zan
Maldives U17 0 - 5 India U17
IND: Vanlalpeka Guite 11'; Lalhmingchhuanga Fanai 25'; Aman 59'; Boby Singh 67' (P); Phoenix Oinam 71'
October 5, Nilaini Zan
India U17 3 - 0 Kuwait U17
IND: Thanglalsoun Gangte 16', 71'; Korou Singh 66'
Nizan Inkhel (Result kan hre hman lo)
Myanmar U17 8:45 PM India U17
October 9, Pathianni Zan
India U17 11:30 PM Saudi Arabia U17
*Group tina point hmu sang ber an tlang
*Group 10 a awm a, pahnihna zinga a ti ṭha paruk an tlang bawk ang.
*India inkhel hi Indian football facebook page-ah a en theih ang.