Messi tan World Cup hnuhnung

Lionel Messi chuan Qatar World Cup chu a tan World Cup a khelh hnuhnung ber a nih tur thu a sawi chiang, kum 35 mi a nih tawh avangin World Cup dang khel leh tura kum li nghah leh chu a tlin a ring tawh lo.

Paris St-Germain forward hian Argentina tan World Cup vawi li a khel tawh, kumin hi a vawi ngana tur a ni. World Cup-ah hian match 19 a khel tawh a, goal ruk khungin a ṭhiante khung tur vawi nga a siamsak tawh bawk.

World Cup 2014-ah khan Messi hian an ram hi pahnihna a nih pui, nikum khan Copa America-ah an champion thung. Kuminah hian an champion lo a nih chuan Copa America kha ram tana nomawi a chawi awmchhun a ni ang.

ESPN zawhna chhangin Messi chuan, "World Cup ka khelh hnuhnung ber a ni ang. Tunah hian World Cup khel turin ni ka chhiar liam mek, a phurawm rualin rilru a kap na khawp mai. Eng thil nge lo thleng dawn tih pawh hriat a châkawm hle," tiin a sawi.

Messi hian 2005 khan Argentina tana a match hmasa ber a khel, match 164 khel tling tawhin goal 90 a khung. Ram tana match khel tam leh goal khung hnem ber record chelhtu a ni mek a, a record hi a sawhngheh belh ngei ang.

Qatar World Cup a khel thei a nih chuan, an ram tana World Cup khel hnem record a chelhpui Diego Maradona leh Javier Mascherano te a khum dawn, a tan chuan sulhnu ṭha a ni dawn.

Messi chuan, "World Cup-ah chuan eng pawh thleng thei a ni, match zawng zawng a hautak vek. Hun kal tawh kan thlir chuan, champion tura rinkai leh team ṭha ber hi an champion kher lo," tiin a sawi.

Argentina hi World Cup-ah chuan Saudi Arabia, Mexico leh Poland te nen group C-ah an awmkhawm.

Messi awmna PSG hian zanin dar 12:30-ah Ligue 1 match khel turin Reims an lenchilh ang.