Arsenal tan Liverpool a harsa dawn

Premier League hmahruaitu chu Arsenal an ni a, club lian dang ṭantute chuan, "A chung bera Arsenal an la awm chuan Krismas a la hla deuh tihna a ni mai," an ti ve thung, rinhlelhna nena an thlir mek Gunners hian fiahna an hmachhawn dawn.

Pathianni zan dar 9:00 hian Emirates Stadium-ah Arsenal chuan Liverpool an lo mikhual dawn. Tunlai boruak thlir chuan, boruak fuh lai leh boruak fuh vak lo lai inkhel tur tia sawi theih a ni - result erawh sawi lawk theih a ni lo.

Mikel Arteta naute hian Premier League match riat aṭangin point 21 an nei, an khingpui tur Reds hian point 10 an nei thung. Tottenham leh Liverpool an hneh zawn thei a nih chuan champion turin an ṭha tawk tihna a ni ang.

An chak lo a nih erawh chuan Arteta naute talbuai bul ṭanna a ni leh thei, an ze ngai a chhuak leh ang tih hi fans lamin an hlauh ber a ni. Jurgen Klopp-a naute tan erawh an boruak chawi nun theihna remchang a ni thung dawn.

Goal a ngai
Liverpool nen an intawn tawhna thlir kir ila, inelna hrang hranga an match hnuhung parukah Arsenal hian Reds lakah goal an khung miah lo! A awmzia chu Virgil van Dijk leh a ṭhian ten an dang phui hneh hle tihna a ni.

Dutch defender Van Dijk chuan, "Arsenal boruak ṭhat vanglai a ni. Premier League kan khelh chhoh dan thlir chuan chak lo tura mite rin zawk kan ni ngei ang. Mahse, anni hi kan hneh thei tih ka hria.

"Inrintawkna an nei sang em em a, an theihna zawng zawnga an khelh ṭhin avangin hmachhawn chu an harsa dawn. Amaherawhchu, kan lo tih ṭhin tawh danin chak thei kan ni," tiin khualmual aṭanga point thum hmuh ngei an tum.

Tun hma angin Klopp-a naute hi an tlarhnung a phui tawk lo. German manager hian goal ven chu a bul aṭanga an zir a ngaih thu tun hnai khan a sawi hial, he thu a sawi zawh hnu hian Champions League-ah Rangers 2-0 in an hneh.

German manager hian a naute a siamṭha thei tih chu inhrilh nawn kan ngai lo. Tun hnaia khel ṭha thei tak Gabriel Jesus leh a ṭhiante dang turin an ṭha tawk tawh em, tih chu kan hre dawn, inkhel a hmuhnawm loh ring suh.

In dahṭha
Thawhlehni zan khan Liverpool-in UCL an khel a, hahchawlhna hun an ngah. Arsenal erawhin Ningani zanah Europa League an khel chauh thung, manager Arteta-a'n Reds an hmachhawn tur thlir ranin a squad a siksawi.

Spurs hnehtu player pariat ngawt hahchawlhtir chungin Bodo/Glimt an hmachhawn a, an mikhual hi 3-0 in an hneh thei tho. Gunners tan striker Eddie Nketiah, midfielder Fabio Vieira leh defender Rob Holding ten goal an khung.

Zaninah erawh an ṭhat theih dan berin an khel dawn. Tlarhmaah Jesus chu an innghahna a ni leh ang - Brazilian striker hi Bodo/Glimt lakah bench aṭanga dah luh a ni a, an goal hnuhnung ber a luh dawna defender pahnih a paltlang dan kha Reds defender lamin an lo hmuin a rinawm.

Jesus hian goal a khung a ni satliah lo a, a khung loh ṭum pawhin a ṭangkai ṭhin. Arsenal tan chuan Jesus hi danglamna siamtu a ni tih phat rual a ni lo, defender tawnhriat nei ṭha Van Dijk hmaah champion pui tham a ni em, tih chu kan hre dawn.

Captain Martin Odegaard, Bukayo Saka, Gabriel Martinelli leh Jesus ten goal an nawr leh dawn a ni a, tlarhnung insiamrem lai Liverpool tan ni danga clean sheet an neih ang nei leh tur chuan thawhrim a ngai ve khawp ang.

Ven ngai Firmino
Sadio Mane chhuah hnuah Liverpool tlarhmain tun hma an la phak thei rih lo. Man tam taka an lakluh Darwin Nunez chu a match hmasa lamah che ṭha mah se hrem a ni a, a lo kir leh hnuah an beisei angin a la khel lo - Arsenal lakah Roberto Firmino-a'n bul a ṭan zawk a rinawm.

Firmino hi midang tana khel ṭhin, tiin hriat a hlawh. Ani hi a khelh fuh chuan ven tham a ni a, defender pawt khawmin a sira awm Mohamed Salah a hlauhawm zual phah leh dawn bawk, defender William Saliba leh Gabriel ten hna an ngah dawn.

Midfield-ah Jordan Henderson leh Thiago Alcantara te an inkawp a rinawm a, Spanish midfielder ke aṭangin ball hlauhawm a chhuak ṭhin. Ani ven hna hi Granit Xhaka leh Thomas Partey te tan hna a ni dawn, an veng thei a nih chuan Reds goal nawr a nep phah thei ang.

Thiago ven a ngaih rualin Liverpool tan pawh Xhaka hi ven ngai tur zinga mi a ni dawn. Swiss midfielder hi Jesus nen an inkawp rem takzet a, manager thluak ṭha Klopp-a'n engtin nge a ven dan tur a ruahman tih hriat a châkawm hle.

Thil pakhat chiang taka sawi ngam a awm, chu chu Liverpool hian tlawm loh hrim hrim an tum dawn. An league match lehpekah Manchester City an hmachhawn dawn a, nomawi an beiseina hma taka a tawp mai loh nan Emirates Stadium aṭanga point hmuh an mamawh.