Ronaldo vanduai zanah United chak

Manchester United boss Erik Ten Hag-a'n duhsak takin Cristiano Ronaldo chu bul a ṭantir a, mahse, Portuguese forward hian a coach duhsakna goal hmangin a chhanglet thei lo.

Red Devils hian Ningani zan khan Europa League-ah Omonia Nicosia chu 3-2 in an hneh a, goal chance vawi tam hlahtu Ronaldo vanneih zan ni se, goal tam zawk khung thei an ni.

Cypriot club Omonia hian rin loh takin goal an khung hmasa a, Karim Ansarifard chuan minute 34-naah goal hmahruai a khung - goal dang lut loin chawlhlawk hman zui a ni a, United dinhmun a ṭha lo hle.

Mahse, Ten Hag-a'n second half-ah Marcus Rashford a luhtir a, English forward hian goal hnih khungin, Anthony Martial goal khung tur a siamsak bawk a, inkhel thlak danglamin a team a chakpui.

Omonia tan Nikolas Panayiotou chuan goal khat khung ve leh mah se awmzia a nei phak lo - United tan Ronaldo-a'n chance a hlah nual a, a bik takin Diogo Dalot siamsak, hnai set sawt aṭanga post pet per nana a hman ṭalhte chu uiawm tak a tling.

Manchester derby-a mualpho hlim, United hian Pathianni zan dar 11:30-ah Everton an lenchilh zui dawn a, derby tlawmna theihnghilh turin Red Devils fan-ten chak an duh ang.