Goal khung thiam Haaland hlawh a tam fal!

Manchester City striker chhuanvawr Erling Haaland a hlawh zat chu tun hnai khan khawthlang media-ten an tarlang a, kar khatah £865,000 (Nuai 796.71) vel a hlawh niin an tarlang hem mai!

Haaland hian nipui transfer-ah khan Borussia Dortmund aṭangin City a zawm a, pound maktaduai 51.2 man niin, kar khatah £400,000 a hlawh a, kum nga chhung atan contract a ziak.

Kum 22 mi forward hlawh zat hi Premier League-a tam ber pawl a ni sa a, mahse, hemi piah lamah hian a goal khung dan a zira pek belh tur engemaw zat a inziak tel a, goal a khung theih em avangin tunah hian kar khata £865,000 hlawh anga chhut a ni!

Norwegian striker hian City a pan hnuah league match riat khelin, goal 14 a khung tawh a, inelna hrang hrangah match 12 khela goal 19 khungin, striker class pangngai takin season khata an goal khung zat ang chu a khung der tawh.

Tun hnai khan Manchester United fans ṭhenkhat chuan England-a Haaland khelhtir phal tawh lo turin campaign an nei fiam hial a, Ten Hag's Reds tia hming indah chuan website pakhat Change-ah Haaland inkhelh khap a nih theih nan 'petition' ziahna tur a siam a ni!

Ten Hag's Reds chuan, "Erling Haaland inkhelh tawh lohna tura petition hi siam a ni a, a inkhelh ve reng hi a fair lo tlat! Danglamna kan thlen thei a, tun hi kan chet hun chu a ni - he robot hi kan ramah a inkhel ve reng tur a ni lo," an ti.

City hian zanin dar 7:30-ah Southampton mikhualin league match an khel dawn a, Pep Guardiola naute hian match riat an khelh tawh aṭanga point 20 neiin, hmahruaitu Arsenal chu point khatin an phak lo mek.