ISL-ah Mizo tlangval an inlan dawn

India rama league ngaihven hlawh ber Indian Super League chu nizan khan khelh ṭan a ni a, fans ngah pahnih Kerala Blasters leh East Bengal an intawn nghal avangin boruak a 'hot' nghal hle - result erawh kan hre hman lo.

Zanin dar 7:30 hian Mizo player awm lohna Bengaluru chuan Mizo pali kawltu NorthEast United an mikhual dawn a, inkhel hmuhnawm beisei ngam a ni. Pathianni zan dar 7:30-ah Hyderabad leh Mumbai City an intawng bawk ang.

Highlander
NorthEast-in full back Joe Zoherliana, midfielder Emanuel Lalchhanchhuaha, forward Laldanmawia Ralte leh Rochharzela te chu Mizo player an kawlte an ni -Bengaluru hian Edmund Lalrindika la kawl mah se a inhliam a, Mizo striker hi squad-ah ziah luh a la ni lo.

Chhinga Veng tlangval Chhara chuan, "Kan inpeih thawkhat tawh a, tun dinhmunah chuan harsatna kan nei lem lo," tiin Vanglaini a hrilh a, season hmasaa inhliam Emanuel-a a dam tawh a, Danmawia'n hliam tenau a neih avangin a inlan theih a rinawm loh thung.

Highlander-in coach Khalid Jamil chelh loin, Israeli coach Marco Balbul an lalut a, kum 55 mi coach hi an ram club ṭha Maccabi Haifa meuh lo enkawl tawh a nih avangin dah hniam theih a ni lo.

NorthEast player thar zingah, Nigeria tana vawi ruk inlan thei Sylvester Igboun, Denmark interna-tional hlui Michael Jakobsen, Real Sociedad defender hlui Jon Gaztanaga leh Blackburn Rovers striker hlui Matt Derbyshire te chu mipui mit fukna tur an ni ang.

Mizo star
Mumbai-in Mizo player pahnih an kawl a, Lallianzuala Chhangte leh ISL player man to ber Lalengmawia (Apuia) te an ni - anni bakah hian Lunglei tlangval PC Rohlupuia a awm a, mahse, he thu buatsaih lai hian East Bengal midfielder hlui hi senior squad-ah dah a ni lo.

Lianzuala chuan, "Pathian zarah hliam kan nei lo a, Apuia hi a dam ṭha lutuk lo a, tunah erawh a zia tawh e. ISL khelh a châkawm tawh a, kan squad a inrualkhai a, kan zir ang leh coach min hrilh anga kan khel thei a nih ngat chuan kan thleng thui ang," tiin Vanglaini a hrilh a, beiseina a neih san thu a sawi.

Mumbai hian Pathianni zan dar 7:30-ah Hyderabad FC an lenchilh dawn a, goalkeeper Lalbiakhlua Jongte, midfielder Lalchungnunga Chhangte leh Mark Zothanpuia te chu Hyderabad-in Mizo player an neih a ni.

Hyderabad FC neitu Varun Tripuraneni chuan, "Manolo Márquez hi chu coach thawkrim lutuk a ni a, hun awl a nei meuh lo a ni ber," tiin Vanglaini a lo hrilh tawh a, Mumbai tan hna a awlsam dawn lo.

Zanin Inkhel Tur
Bengaluru FC 07:30 PM NorthEast United

October 9, Pathianni Zan
Hyderabad FC 07:30 PM Mumbai City