Chelsea-ah Costa a kir dawn

Diego Costa vanglai sawi a nih apiangin Chelsea-a season thum a khelh kha sawi tel a ngai ṭhin - kum 34 mi striker rorum hi zaninah Stamford Bridge-ah a kir dawn a, tun ṭumah erawh Blues jersey ha loin, Wolverhampton Wanderers jersey nen a inlan ang.

Chelsea hian zanin dar 7:30-ah Wolves an mikhual dawn a, Wolves striker thar Costa pawh inlan tura beisei a ni - Costa hian September 12 khan free transfer-in Wolves hi a zawm a, October 1 khan a match hmasa ber a khel ve chauh thung.

Spain international hlui hian January 2022 khan Atlético Mineiro-a a contract chu a titawp a, fitness a tlakchham avangin a inlan lawk lo - a match hnihnaah Chelsea a hmachhawn dawn a, a awlsam lo ang.

Chelsea hian "Bem vindo a casa" (I inah kan lo lawm a che) tiin Costa lawmna thu chu an website lamah an ziak tawh a, match 120-a goal 59 khung a, Premier League nomawi pahnih chawipuitu hi an theihnghilh lo.

Mahse, London club hian khelmual chhungah erawh zahngaihna lantir an tum lo ang - coach thar Graham Potter hnuaiah Chelsea an intuaithar mek a, English coach hian a match hmasa berah Red Bull Salzburg (1-1) draw pui mah se, Crystal Palace (2-1) leh AC Milan (3-0) an hneh leh tawh avangin an inringtawk hle.

Hetihlai hian zanina an hmachhawn tur Wolves hi coach Bruno Lage ban hlim an ni a, league match riata vawi khat chiah la chak team hian a thlakna an la nei lo. Under-21 coach James Collins leh U18 coach Steve Davis hoin Blues an hmachhawn dawn a, Chelsea laka point hlawhchhuah a awlsam lo ang.