La Liga boruak a sang zel
Barcelona an insiamṭha a, La Liga boruak a ngaihnawm phah leh ta sawt - Catalan club hian table chung ber luahin hma an hruai mek a, an point hmuh zat ang hmuin Real Madrid an awm ve bawk.
Real hian zanin dar 12:30-ah Getafe an lenchilh dawn a, hetihlai hian tun season-a tluk leh din fawmtu Atletico Madrid chuan zanin dar 7:45-ah Girona an mikhual ang a, Barca erawh Pathianni zanah an inlan chauh ang.
La Liga hmahruaitu hian Pathianni zan dar 12:30-ah Celta Vigo an mikhual dawn a, Champions League-a chak lo hlim team hian an mangchhia mangṭha turin hnehna chan an duh dawn.
Hei le Real
Real Madrid-in an league match hmasa pasarihah tlawm an nei lo - mahse, match ruk zet a zawna an chak hnuah an match hnuhnung berah Osasuna chu 1-1 in an inhnehtawkpui a, Barca-in hma an hruai phah.
Spanish champion hian Champions League an khel zui a, 2-1 in Shakhtar Donetsk hneh mah se an chance hlah zozai thlirin Carlo Ancelotti tan lungmuang taka awm a hun lo tih a lang a, tlarhma an intahhriam leh a ngai.
Karim Benzema-a'n hliam aṭanga a lo kir hnuah ngai a la awh leh lo a, Osasuna lakah penalty a hlah hial avangin zaninah chuan goal khung tura beisei a ni ang - Real hian Getafe zawha league-a an tum leh hmasak ber tur chu Barcelona a ni a, Catalan club an tawn hmain insiamṭhat an mamawh.
De Jong a dam
Barcelona-in La Liga-ah hma hruai mah se Champions League-ah Inter Milan an ngam loh avangin an dinhmun a derthawng a, insiamṭhat an mamawh - Pathianni zanah Celta Vigo an mikhual dawn.
Catalan club-in Celta an mikhual hmain chanchin lawmawm an nei a, international break-a a inhliam hnuah Frenkie de Jong chuan training a zawm leh tawh a, Celta hmachhawn tura inpeih hman tura beisei a ni.
Barca hian an league match hmasa berah 0-0 in Rayo Vallecano an draw tih loh chu hnehna an la chang vek a, mahse, CL match thumah vawi hnih an tlawm avangin insiamṭhat an mamawh tih erawh a hai theih loh.
Atletico beiseina
Diego Simeone kaihhruai Atletico-in season an hmang ṭha lo hle - Barca leh Real el phak ber team hian league match sarih an khelhah vawi li hnehna an chang a, vawi hnih tlawmin, vawi khat draw an nei - zaninah insiamṭhat an mamawh.
Champions League lamah pawh Atletico an nawi hle - match hmasa berah Porto hneh ve mah se Bundesliga lama talbuai Bayer Leverkusen leh Belgian club Club Brugge chu 2-0 ve vein an ngam lo a, tunlai chu Atletico fan-te mut a tui lo!
Zanina an mikhual tur Girona hi league match sariha vawi hnih chiah la chak team an nih avangin Atletico tan hneh theih an ni a, hetihrual hian Club Brugge laka lakchhuah ngai Marcos Llorente hliam a dam hman loh chuan Atletico tan chânna a ni ang.