Verstappen a champion ang - Leclerc

Pathianni zan tir dar 5:30 hian Formula 1 Japanese Grand Prix tlan a ni dawn, driver championship hmahruaitu Max Verstappen chu champion mai thei dinhmunah a ding - a elpui ber Charles Leclerc chuan Max hi a champion mai a ring.

Japanese Grand Prix-ah Verstappen a chak (25 points) a nih a, fastest lap nei chunga bonus point (1) a hmuh bawk chuan, driver dangte result ngaihchan tel ngai loin a nomawi kawl lai a humhim fel der dawn, a dinhmun a duhawm hle.

Ferrari driver Leclerc chuan, "A nihna tak sawi chuan Max hi a champion thuai ka ring, tun intlansiakah a nih loh pawhin ni dangah a champion thuai ang," a ti, car intlansiakna sang ber hi tun season atan tlan hmabak panga an la nei.

Khawchin thlirna aṭanga a lan dan chuan, tunkar tawp hian Japan ramah ruah a sur dawn niin a lang. Suzuka tlankawng a huh ngeiin a rinawm a, chuvangin intlansiakah hian chetsual theihna a sang, eng pawh thleng thei a ni dawn.

Red Bull driver Verstappen chuan, "Japan ramah hian ka champion thei a nih chuan a lawmawm ngawt ang, ka la champion ta chiah lo a nih pawhin dawhthei takin ka nghak leh mai ang," tiin a sawi.

Verstappen hian tun season intlansiak 17 zinga 11-ah hnehna a chang thei. A bik takin Europe khawmualpuiah a che ṭha hle. Mahse, kar hmasa aṭang khan Asia ramah an tlan - Singapore GP bikah chuan beisei a phak lo, a tan Japan GP hi fiahna a ni ang.