Zanin dar 10-ah Der Klassiker

Bundesliga-a club inhal pahnih Borussia Dortmund leh Bayern Munich te zanin dar 10:00 hian Signal Iduna Park-ah an inkhel dawn. Bayern hi champion lai ni mah se pathumnaah an awm mek a, Dortmund hi palinaah an awm chungin Bavarians nen an point hmuh zat a inang. An point aṭanga teh chuan team pahnih an intluk tawk hle.

Der Klassiker hnuhnung ber chu kumin April 23 kha a ni a, Robert Lewandowski leh Erling Haaland te awm lai a ni. Bavarians an chungnung zawk a, 3-1 in hnehna an chang. Tun ṭumah goal khung thei striker pahnih awm tawh lo mah se Champions League-a an khelh dan thlirin team pahnih hi an la ṭha reng.

Bayern hian international break zawhah harhtharna changin Bayer Leverkusen 4-0 in an hneh a, Champions League-ah Victoria Plzen 5-0 in an sawp leh bawk. Bavarians hi UCL-ah an dinhmun a ṭha a, Bundesliga-ah an insawrbing thei ang. Dortmund erawhin league match hnuhnung berah FC Cologne chu khualmualah 3-2 in an hneh lo a, chutihrualin UCL-ah erawh Sevilla 4-1 in an sawp.

Team pahnih hi kar laihawlah chiang takin an chak ve ve a, Der Klassiker a hmuhnawm sawt dawn. Bavarians tan rawlthar duhawm Jamal Musiala a khel ṭha zel a; Leroy Sane, Sadio Mane leh Serge Gnabry te goal bawh a na viau bawk. Chutihrualin match hnuhnung berah Covid-19 positive vangin Joshua Kimmich leh Thomas Muller te an inlan lo a, Dortmund an hmachhawn thei ang em, tih a chiang lo.

Dortmund pawhin rawlthar duhawm Jude Bellingham an kawl a, kum 17 mi striker Youssoufa Moukoko pawhin Sevilla laka goal a khung avangin Anthony Modeste aiin bul a ṭan a rinawm zawk. Edin Terzic-a hote hi Bayern ang thoa khelh ṭhat ṭum leh chhiat ni nei an ni a, Signal Iduna Park-ah an khelh ṭhat ṭum a thleng a nih chuan Julian Nagelsmann-a hote tan chetsual theihna a ni ang.