Milan mualah Juventus
Serie A champion AC Milan chuan zanin dar 9:30 hian league match khel turin Juventus an lo mikhual dawn. Italian champion nih tum pahnih tan point thum hmuh a pawimawh, point an hloh a nih chuan table chung lama lawn kai a harsa zel dawn.
Milan hi Champions League lama Chelsea hneh lo hlim an ni. Old Lady erawhin Maccabi Haifa 3-1 in an hneh thung, European football lama an result hnuhnung a inang lo - zanin erawh Serie A a nih avangin a boruak a danglam ang.
Fimkhur a ngai
Monza laka an mualpho hnuah Juventus hian Bologna leh Maccabi Haifa te an hneh a, tun season atan chuan a zawna vawi hnih hnehna an chan hi thil duhawm a ni, zaninah chhunzawm ngei pawh an tum ang.
Juve manager Massimiliano Allegri chuan, "A nihna takah chuan a zawna match hnih chak hi sawi vul tur a la ni lo. Mahni inenfiah chung zelin, kan hmaa tih tur awm kan hlen chhuak zel tur a ni ang," tiin a sawi.
Italian club hian hrem vangin Angel di Maria an chhawr thei dawn lo. Argentina international hian Serie A match hmasa lama red card a hmuh hremna chu a hmang zo ve dawn chiah a, an match lehpekah chuan a khel thei tawh ang.
Di Maria hi UCL-a assist vawi thum nei hlim a ni a, ani tel thei lo tur hi Allegri tan chuan chânna lian tak a ni dawn. Striker Dusan Vlahovic thlawptu pawimawh a ni a, zaninah chuan Serbian hmatawng hi Adrien Rabiot nen an inchawm tura ngaih a ni.
Chak ngai Milan
Stefano Pioli enkawl AC Milan hi champion lai an ni a, kuminah pawh champion leh tura rinkai an ni. Mahse, hliam an ngah avangin season hmasa lama an game hmuhnawm tak ang kha an la chhawp chhuak thei rih meuh lo.
Chelsea an hneh loh hnuah coach Pioli chuan insiamṭhat nghal an mamawh thu a sawi, zaninah an tlawm leh a nih chuan Serie A nomawi an kawl lai pawh humhim a harsa dawn, chuvangin San Siro-ah a khat tlata fans pungkhawm turin a duh thu a sawi hial.
Milan hian match riat aṭangin point 17 an nei, table-ah chuan pangana an ni; hmahruaitu Napoli nen an inkarah point thum a awm, a awmzia chu an inkara awm Atalanta, Udinese leh Lazio ten bul an ṭan fuh vek a, elpui tham an ni.
An hnuaiah AS Roma, Juventus leh Inter Milan te an la awm bawk. Tun season Serie A chu champion tum ngam an tam, chuvangin mahni elpuite lak aṭanga point thum laksak theih a hlu zual dawn, zanin inkhel pawhin ngaihven a hlawh phah ang.