Liverpool chet ṭhat awih har titu Werner

Premier League hmahruaitu Liverpool chairman Tom Werner chuan tun hnaia an club chet ṭhat dan chu awih har a tih thu a sawi a, "A chang chuan keimah leh keimah hi ka insik hial ṭhin a ni," tiin thil thleng chu a tak ram a ni chu mak a tih thu a sawi. 

Merseyside club hian Premier League-ah table chung ber an luah mek a, league match 25 an khelhah tlawm la nei loin point 73 an nei tawh - point 75 hlawhchhuah theih aṭangin point hnih chiah an la hloh!

Liverpool hnaih bertu Manchester City chuan Reds hi point 22-in an phak lo mek a, Jurgen Klopp luh hmaa an dinhmun ngaihtuahin Reds chairman Werner-a'n an thlen chin mak a ti hi a awm viau mai. 

Werner chuan, "Kan hun tawn mek hi nuamti taka hmang turin ka biak apiang hnenah ka hrilh zel a ni. Record kan siam zozai te hi en ila, hetiang ang hun duhawm tawn leh hi chu a awlsam lo ang tih ka chiang a ni," a ti. 

Liverpool hian kum 30 chhung zet chu an league nomawi 19-na chawi turin an nghak tawh a, tun season-ah Premier League nomawi chawi turin match 13 an la hmabakah match ruk chak bak an mamawh tawh lo. 

Kum 69 mi Werner chuan, "Premier League inelna hi a hautak em em a, hei vang hian chak loh ve mai inrinna hi ka nei ṭhin. Mahse, chutiang thil chu a la thleng lo a, kartinin ṭha takin kan khel zel a ni. 

"Mahse, Jurgen-a'n a sawi angin hna kan la zo lo a, engmah kan la hlawh chhuak lo. Season tawpah duhtawka lawmna hun chu kan la nei dawn a ni," a ti a, an coach Jurgen Klopp thusawi a pawmpui thu a sawi. 

Liverpool hian February 15 zanah league match an khel dawn a, Norwich City chu khualmualah an lenchilh ang. Reds hian Champions League leh FA Cup-ah last 16 an lut tawh bawk a, UEFA Super Cup leh FIFA Club World Cup nomawi an chawi tawh bawk.