Jeje - 1 goal + 1 assist = Asian Cup

Kum 2011 Asian Cup hnuah India chuan a vawi khat nan Asian Cup an khel leh dawn ta. Nilaini zan khan India hian an mikhual Macau chu 4-1 ngawtin an sawp a, match khelh tur pahnih la nei mah se vawi li an khelhah hnehna an chan vek avangin Asian Cup 2019 khel turin an tling chiang tawh.

Ṭum dang ang bawkin Mizo tlangval Jeje Lalpekhlua chu India tan player pawimawh a ni - Hnahthial tlangval hian goal khat a khung bakah assist vawi khat a nei a, Rowllin Borges leh Sunil Chhetri ten goal khat ve ve khung bawkin Macau player Lam Seng-a chuan an lamah a tilut bawk.

Inkhel chu
India coach Stephen Cons­tan­tine-a'n 4-2-3-1 formation a hmang a, tlarhmaah Jeje chu mal tlattir a ni. Hnahthial tlangval thlawp turin a hnung chiahah captain Sunil Chhetri a awm a, rin loh takin Udanta Singh aiah Jackichand Singh chu luhtir a ni bawk.

Inkhel ṭantir aṭangin India-in game an thunun nghal a, Jeje leh Chhetri-ten chance duhawm an nei nghal. Goal khung turin India-in an nghah rei a ngai lo. Minute 28-naah Jeje-a'n Borges a hmu fuh a, Goan midfielder hian Jeje-a hnen aṭanga a ball ṭha hmuh chu goal-ah a chantir.

Blue Tigers
Macau-in goal an chhuah aṭanga minute 10-naah Nicho­las Tarrao chuan si phurh sutna goal a tauh lut a, Sandesh Jhingan leh Pritam Kotal te chu mawhphurtu an ni. An goal khung lawmin Macau an lam a, Blue Tigers (India sawina) chhaih kawlhna goal mai a ni tih reng an hre lo.

Minute 60-naah Chhetri a inlar a, Indian legend hian Balwant Singh hnen aṭanga a ball ṭha hmuh chu hmahruaina goal ni turin a khung. Macau an tho leh tawh lo - Halicharan Narzary ball cross chu Lam Seng-a chuan an lamah a tilut a, Jeje-a'n hun ṭha duhawm vawi hnih a hlah hnuah chak nemnghehna goal a khung ve leh bawk. India an chak chiang.

Khawiah nge Mizo?
India tan Jeje Lalpekhlua player pawimawh a ni reng a, mah se Hnahthial tlangval bak India tan regular-a khel phak Mizo an awm meuh lo. Mizo player langsar zingah Lalrindika Ralte leh Lalchhuanmawia Fanai-ten India tan hmun pawimawh chang hman mah se hliam an tawrh hnuah ngai an la awh leh rih lo a, an hmun hloh tawh chang leh turin hun an la duh.

Macau hmachhawn tur squad-ah Jeje bakah Jerry Lalrinzuala leh Lalruatthara an awm a, mah se khelhna hmun an chang phak lo. Asian Cup khelh hun tur hi 2019-a ni a, UAE-ah Mizo tam zawk inlan turin hun a la awm tihna a ni. Jeje chuan, "Mizo player-te kan ṭan lehzual a ngai a, Asian Cup khelh hmain hun a la tam. Keimahniah ṭheuh chona thar insiam ila, Mizo tam zawkin Asian Cup kan khelh ka duh a ni," tiin Vanglaini a hrilh a, a Mizo player puite ṭang lehzual turin a fuih.

Hmanah chuan...
India-in Asian Cup a khelh hmasak ber chu kum 1964 khan a ni a, pahnihna dinhmun an luah. Kum 1984-ah a vawi hnih nan an inlan leh a, group stage an paltlang zo lo. India an reh vang vang a, Bob Houghton hnuaia harhtharna an chan hnu kum 2011-ah an khel - mah se Australia, South Korea leh Bahrain te nen group khatah awm hoin last 16 an lut lo chiang hle.

Jeje Lalpekhlua chuan, "Ka career-a ka thil tawn ropui ber ang hialah ka ngai. World Cup khelh phak hi chu kan la hlat deuh a, tun dinhmuna kan thlen ve theih sang ber chu Asian Cup hi a ni. Khawmualpui inelnaah kan chet ṭhat phawt chuan World Cup hial pawh kan la sawi ve ngam ang chu. Match 12 ngawt tlawm hmel hmu loin kan kaltluang tawh a, record siam chunga kan inpetkai hi a lawmawm hrim hrim a ni," tiin Vanglaini a hrilh.

India an vul
Blue Tigers hi 'milian mut­thlu' tia sawi an ni ṭhin. Kum 1952 leh 1962 Asian Games-ah football-ah an champion thei a, sulhnu chhuanawm a nei chhunzawm lo - SAFF Championship (6) leh Nehru Cup (3)-ah champion mah se an hmachhawn team ngaihtuahin inchhuanna tur chi a ni lo. AFC Challenge Cup 2008 nomawi an chawi khan Asian Cup khel turin an tling a, group stage aṭanga an tlak hnuah Bob Houghton-a'n player naupang rual khawmin Jeje-te ho hun ṭha a pe a, AFC Challenge Cup qualifier-ah awlsam takin hnehna an chang vek - mah se AIFF nen inhmuhthiam loh avangin English coach a bang a, Indian football a hnung zawngin a kal.

Stephen Constantine hnuai­ah India-in harhtharna a chang leh mek a, Jeje chuan, "Asian Cup khelh hi kan tum em a, chu chuan player tinah chona thar min pe. Player-te hi hun rei tak khel ho tawh kan nih avangin kan in man em em bawk a, kan thawkrim bawk. Chung zawng zawng ṭangkhawm chuan tun dinhmun hi min hruai thleng a ni," tiin Vanglaini a hrilh.