Nadal leh Federer chak nghal

Rafael Nadal leh Roger Federer ten world number 1 ni chunga season khartu zawk nih tumin hma an la mek a, Nilanini zan khan Shanghai Masters-ah an match khatna khelin hnehna an chang.

China-a inkhelah world number 1 Nadal hian Jared Donaldson lakah 6-2, 6-1 in hnehna a chang a, a service bikah point li bak a hloh lo, hnehna chang tur hian minute 54 bak a mamawh lo a ni - tun hnaiah a zawnin match 13 hnehna a channa chiah a ni bawk.

World number 2 Federer pawhin Argen­tina tlangval Diego Schwartz­man lakah 7-6(4), 6-4 in hnehna a chang ve bawk. Player ropui pahnih hian nizan khan second round an khel zui a, he thu buat­saih lai hian result kan hre hman lo.

Spain tlangval Nadal hian ATP ranking-ah amah hnaih bertu Federer aiin point 2,370 in a hmu sang zawk mek a, tun tournament an khelh lai Shanghai Masters cham­pion hian ranking point 1,000 an hmuh belh ang - season khar nan ATP Finals an la hmabak bawk.

Kum 31 mi Nadal chuan, "Ka beisei aiin hun kan hmang rei lo a, a lawmawm lam a ni. Ranking hi ka ngaih pawimawh ber ni hran lo mah se a chung bera awm chunga season khar chu duhthusam a ni," a ti. Nadal-a'n world number 1 ni chunga season a khar hnuhnung ber chu kum 2013 daih tawh kha a ni.

Grand Slam vawi 19 champion tawh Federer chuan, "Schwartzman khan inrintawkna a nei a, hmachhawn a hautak hle. Sanghai-ah hian player ṭha an inlan hnem a, match tin mai hi a hautak chho dawn hle a ni," tiin a sawi.

Nilaini inkhel dangah seeded parukna Grigor Dimitrov chuan Ryan Harrison-a'n match point vawi thum a hmuh tawh chu pawtthla lehin 3-6, 6-3, 7-6 (6) in hnehna a chang let thei. Player dang Gilles Simon, Alexander Zverev, Sam Querrey leh John Isner te pawhin hnehna an chang vek bawk.