Ramhlun North chakpuitu Remruata

Mizoram Premier League Season 6-a match nga chhung chak hmel hmu tawh lo Ramhlun North-in Lungleiah Lalremruata goal hmangin Bethlehem Vengthlang FC 1-0 in an hneh.

Ṭhuamluaia Mualah inkhel entu an tam a, football ngaihhlutna hmun Lunglei mipuiin Mizoram chhunga inelna sang ber MPL an ngai pawimawh thiam hle.

Nimin inkhel result avangin MPL a ngaihnawm sawt a, semifinal luh inchuh boruak a sang dawn. Ramhlun North hi pasarihna aṭangin paruknaah an insawn chho a, pahnihna Chanmari FC leh pathumna BVT an phak lohna chu point li chauh a ni.

Remruata 7

Ramhlun North tana jersey number 7 hatu Remruata'n tun season-ah goal sarih a khung tling ta a, MPL6-a goal khung tam ber a ni mek.

Tuikual North tlangval Remruata hian minute 25-naah captain C. Ram­dinmawia cross ball chu a tauh goal a, he goal hi Ramhlun North-in Lammuala an hneh tawh loh BVT laka phuba lak nan a tawk.

Liberian defender Korhena A. Boekai-a'n Ramhlun North tan a vawi khat nan a inlan a, tlarhnung a phui phah hle; BVT lakah goal an chhuah lo.

Eng nge an sawi?

Bethlehem Vengthlang coach Chawng­thansanga chuan, "Kan vanneih ni a ni lo a ni. Ka naute an thawkrim em em a, an khelh danah sawisel tur ka hre lo a, kan vanduai a ni," tiin inkhelh banah a sawi.

BVT hian season liam ta khan Cham­phaiah hnehna an chang tawh lo a, hemi ṭuma Chawnga enkawl Chhinga Veng pawhin Lammual pawna MPL khelh hmasak berah an chak bik lo.

Ramhlun North coach Samson Ram­engmawia chuan, "Hun chanve hnu lamah BVT an chungnung zawk a, goal chance erawh kan ngah zawk. Kan khel ṭha lo a nih pawhin hnehna kan chang tur a ni tiin ka naute ka fuih a, an khelh danah ka lawm hle a ni," tiin chak phu zawk an nih thu a sawi.

ZoFooty Statistics
Ramhlun North 1 - 0 Bethlehem VT
RNFC : Lalremruata 25'
MoM : Lalrinfela, RNFC
47% Ball Possession 53%
14 (7) Shots (On Target) 14(8)
1 Yellow Card 1
0 Red Card 0
Powered by Rainbow Multibrand Mobile Showroom