Chhinga Vengin Chanmari an lehthal

Mizoram Premier League tun season-ah Lalsangzuala Hmar enkawl Chhinga Veng FC hneh thei an la awm lo. Nimin khan Ṭhuamluaia Mualah Chanmari FC-in Joe Zoherliana hmangin goal khung hmasa mah se Chhingcows-in MS Dawngliana goal hnih hmangin 2-1 in an lehthal.

Chhinga Veng hian point 20 hmuin an hmahruaina an sawh­nghet chho zel a, match li chhung chak hmel hmu tawh lo Chan­mari FC-in point 12 hmuin semi­final khel turin an dinhmun a him lo.

Chanmari hun

First half-ah Chanmari FC-in inkhel an thunun a, minute 12-na lekah Ṭhasiama corner pet chu Lengpui tlangval Joe Zoherliana'n a tauh lut.

MPL champion laiin inkhel an thunun zui a, Chanmari FC forward Jakob Vanlalhlimpuia'n ṭha taka lalutin keeper Zothan­mawia chiah hmachhawn mah se Chhinga Veng keeper hian a goal khung tur hi a dan sak hman.

Winger tlan chak Lalmuan­zova'n Chanmari goal hnihna khung theihna tur a nei a, keeper awm tawh loh hnuah goal zawnah a pet nachungin Chhinga Veng defender K. Lalthlahlova'n (Patea) a inrawlh hman. First half-ah Chanmari goal khatin hma an hruai a, goal tam zawk khung thei dinhmunah an ding.

Chhinga Veng hun

Chhinga Veng coach Lal­sangzuala Hmar-in sub­sti­tute awmze nei siamin Lal­khawpuimawia (Mapuia) an luhtir a, Kelkang tlangval hi inkhel dang­lamna a ni.

Minute 64-naah throw in aṭanga ball kal chu Mapuia'n a tauh per hnuah Dawngtea'n a lu hmang bawkin goal a chantir a, Bawngkawn tlangval hian minute 74-naah Mapuia cross chu chakna goal khung nan a hmang leh bawk.

Chhingcows-in minute 90 a zawh meuh chuan ball an chang tam zawk a, goal chance an inhnem zawk a, chak phu zawk an a, tun ṭum hi tun season-a Chanmari FC vawi li an hnehna a ni.

An kal zel

Chhinga Veng hian coach Sanga hnuaiah tlawm hmel hmu loin match 20 an khel tawh a, coach H. Vanlalthlanga hnuaia Chanmari FC record tluk pha turin match khat chiah an mamawh tawh.

Chhinga Veng hian October 19, Ningani zan hian Chanmari West an hmachhawn ang a, hemi ni vek hian Chanmari FC leh Aizawl FC an inkhel bawk ang

ZoFooty Statistics
Chanmari FC 1 - 2 Chhinga Veng FC
CFC : Joe Zoherliana 12'
CVFC : MS Dawngliana 64', 76'
MoM : MS Dawngliana, CVFC
43% Ball Possession 57%
11(7) Shots (On Target) 20 (12)
0 Yellow Card 0
0 Red Card 0
Powered by Rainbow Multibrand Mobile Showroom