Leitlangpuiah I League champion Aizawl FC thar vs Police thar

I League champion Aizawl FC-in Romanian midfielder Andrei Ionescu leh Afghan defender Masih Saighani te Mizoram Police hmachhawn turin an chhawr dawn a, theihna sang bik player pahnihin Ṭhuamluaia Muala bul an ṭan tur hi Lunglei mipui an vannei hle.

Mizoram Premier League Season 6 inkhel pawimawh tak hi tlai dar 2:15-ah khelh a ni dawn a, Zonet Rihnim-ah pekchhuah a ni ang.

Intawnna hmasa

September 21 khan Lam­mualah Aizawl FC-in Mizoram Police hi 6-1 in an sawp a, Police goal khat pawh hi AFC defender Kareem Omolaja khung a ni.

I League champion tan hian Rochharzela'n hattrick a siam bakah Hmingthanmawia, Alfred Kemah Jaryan leh Jonathan Lalrawngbawla ten goal khat ṭheuh an khung bawk.

An intawn tawhna aṭanga thlir chuan AFC-in harsatna nei loin point thum an hmu thei a, amaherawhchu an intawn leh hmain coach Lalbiaksanga Colney hnuaiah Police an insiam ṭha hman.

Police thar chu

Mizoram Police-in I League champion an hneh loh zawhah sea­son liam taa Bethlehem Veng­thlang FC chet ṭhat puitu BS-a Colney an lalut a, Armed Veng pa hian danglamna a thlen nghal.

Police-in Chanmari West (2-1) leh Ramhlun North FC (4-3) a an hneh nghal avangin phase 1 a zawh chuan relegation zone an chhuahsan a, tlak loh pumpelh aiin semifinal an thlir tawh.

October transfer-ah squad thuam chak nan defender pahnih Toky Zomuanpuia leh C. Zomuanpuia te an lalut a, goal 22 zet phase 1-ah goal an chhuah avangin tlarhnung thuam ṭhat hi an mamawh tak a ni.

Police coach BS-a Colney chuan, "Kan intawnna hmasa kha chu ka awm hma a ni a, chapona ni lo se awm ilang chuan khatiang ang kha chuan min sawp lo ang. Player-te nen kan inkar a ṭha a, kan thil zir an man chak a, hneh ngei tumin kan khel ang," tiin chak tuma an khelh tur thu a sawi a, an player thar ten inkhel bul an ṭan tur thu a swi bawk.

BVT coach hlui BS-a chuan sawi chhunzawmin, "Lunglei lama kan Police puiten banner nen rawn thawhchhuah an tum a, min tih phur phah khawp mai. Kan team hian foreigner kan nei lo a, league-a foreigner awm hi hmasawnna a ni. Ka naute pawhin AFC player tharte hi hmachhawn an châk khawp ang," tiin Vanglaini a hrilh.

MPL6-ah Police hian goal 12 an khung tawh a, tlar­hmaah goal li khung tawh F. Lalrinpuia bakah MPL-a top scorer ni tawh Lalbiakhlua, Lalfakzuala leh Lalsangbera te an neih avangin an tlarhma hi chu chhuantham an ni.

AFC thar ve thung

Aizawl FC-in Paulo Mene­ses hnuaiah hliam vangin harsatna an nei a, phase 1-ah match sarih aṭangin point 9 chiah an hlawh chhuak.

I League champion hian an match hnuhnung berah Bethlehem Vengthlang 2-0 in an hneh a, hemi ṭum hian defender Kareem chu hliam vangin an chhawr thei lo a, tlarhma lamah inhliam an tam avangin Alfred Kemah Jaryan chu striker-ah chhawr a ni.

Portuguese coach Meneses-a'n I League thlir chungin foreigner pahnih a thlak a, Romanian midfielder Ionescu leh Afghan defender Saighani te phase 2-a hman turin a dah lut. Ionescu hi Dutch club lar PSV Eindhoven aṭanga inzir chhuak a ni a, Romania tan kum bithliah inelnaa a khelh tawh bakah Europe-a club lar ni phak Steaua Bucharest tan pawha khel tawh a nih avangin a thiam khawp ang.

Afghan defender Saighani hi feet ruk leh inches hnih zeta sang a ni a, ram tana vawi 11 inlan tawhin Germany club tenau

ṭhahnem tak tan a khel tawh a, MPL-ah fiahin a awm dawn.

Goal khung tur?

Aizawl FC striker pahnih Jonathan Lalrawngbawla leh Lalruatfela Zote te an inhliam a, training-naa inhliam S. Malsawmtluanga (Mama) te nen Lunglei an zin ve thei lo.

AFC-in goal khung tur an mamawh a, I League-a champion-na goal khungtu William Lalnunfela chu a dam hman a nih chuan no. 9 position a luah ang. Romanian midfielder Ionescu chuan no. 10 role a chelh dawn a, mual sir lama awm Rochharzela leh H. Lalmuankima te chu goal khung tura an hmachhuan te an ni thei ang.

Portuguese coach Meneses chuan, "Lunglei mipui hmaah inkhel hmuhnawm lantir turin theihtawp kan chhuah dawn a, chak ngei kan tum a ni," tiin Vanglaini a hrilh.