Lungleiah Aizawl West Derby
Dinthar FC coach thar Vanlalrova chuan Ṭhuamluaia Mual aṭangin fiahna a hmachhawn ṭan dawn a, vawiin chawhma dar 11:30 hian Chanmari West FC an hmachhawn ang.
Mizoram Premier League Season 6-ah Maimawms hi table mawngphahah an awm a, West Warrior nen an inkarah point thum chiah a awm.
Dinthar FC hian coach Rova rual hian Mizo player pathum Lalthawmmawia, Tlangthanpuia Ralte leh Saihmingthanga bakah Naga player Lironthung Lotha leh Khasi player Khrawkupar Tamu te an lakbelh. Mi thar panga zingah Rova'n Luangmual FC-a a hman thiam tawh midfielder Thawma a chhawr nghal ang.
Rova chuan, "Kan team boruak a ṭha a, chona thar kan hmachhawn tur hi a phurawm ka ti. Theithawp kan chhuah ang a, Pathian zarah result ṭha kan neih theih ka beisei," tiin Vanglaini a hrilh.
Chanmari West-in coach thar hnuaia Mizoram Police match hmasa ber a hmachhawn a, an chak tawh lo. Coach HC Zarzoliana chuan, "Police leh Dinthar FC coach thar neih dan a inang lo. Police chu player-te inhre chiang sa vek an nia, an mamawh chu coach thar hnuaia phurna a ni. Dinthar erawhin hun an mamawh turah ka ngai," tiin coach thar nei team laka tlawm nawn a tum lo.
West Warrior hian Aizawl FC aṭangin Vanlalduatsanga an lalut a, India sub junior team tan pawha khel tawh player hian vawiin hian a match hmasa ber a khelh a rinawm.