November 13 aṭangin MBL

Hrangbana Memorial Mizoram Badminton League vawi thumna chu November 13-24 chhung hian khelh a ni leh dawn. Nimin khan Zonet Studio-ah main sponsor Hrangbana fapa Zohmingthanga leh MBA aiawh ten inremna an ziak a, contract hlut zawng hi cheng nuai nga a ni.

MBL3 hi kum dang ang thoin mixed team inelna a ni dawn. Men's Singles match pahnih bakah Boys Singles (Under 19), men's dou­bles leh mixed doubles hmanga inelna hi neih tur a ni.

Kumin hian inelna hi R. Dengṭhuama Stadium, Aizawlah neih a ni dawn a, team tel turte pawh tihfel a ni tawh bawk. Tun ṭumah hian team pariat Champhai Ralte Villa BC, Hlimen Shuttlers, Southern Acers Saiha, Tuikual Shuttlers, Mission Veng , Kanan, Zotlang leh Chanmari te an inel ang. MBL-ah hian Tuikual Shuttlers chu champion lai an ni.

Mizoram chhunga badminton inelna sang ber MBL-ah hian TV partner chu Zonet a ni a, online media partner chu inkhel.com te a ni.