England leh France-in last 16 an lut

FIFA U17 World Cup-ah a thiam 16 zinga tel phak turin England leh France-in harsatna an tawk lo - England hian Nilaini zan khan Mexico chu 3-2 in an hneh a, France chuan 2-1 in Japan an hneh thung. Ram pahnih hian an match hmasaah hnehna an chan ve ve tawh avangin last 16 an lut chiang.

Nilaini zan inkhel dangah Honduras chuan 5-0 ngawtin New Caledonia an sawp a, Iraq chuan 3-0 in Chile an sawp bawk. Iraq hian vawi hnih khelhah point li an hmu tawh a, last 16 la lut chiang lo mah se knockout stage an lut ngei dawn niin a lang ta.

Young Lions

England-in an match hmasa berah Chile chu 4-0 ngawtin an sawp a, Mexico lakah pawh goal khung an thiam tih an pholang. England hian minute 55 chhungin goal thum an khung a, chak tur a chiang fel tawhah ngaih a ni - mah se Mexico hian minute 65 hnuah Diego Lainez hmangin vawi hnih goal an khung a, England an ṭang tlang hram.

Young Lions tan Rhian Brewster chuan minute 39-na lekah goal hmahruai a khung a, Liverpool rawlthar duhawm hian inkhel ṭantir lamah goal ruaka a pet goal loh hnuin freekick mawi zet hmangin a tihsual a thup. Chile laka vul tawh Jadon Sancho a vul chhunzawm a, Borussia Dortmund winger hian Manchester City tana a khelhpui ṭhin Philip Foden goal khung tur a siamsak bakah El Tri (Mexico sawina) captain Carlos Robles handball vanga an penalty hlawhchhuah chu goal-ah a chantir.

Iraq tan Dawood

U17 World Cup ṭan a nih hmain Mohammed Dawood-a hmingin ngaihven a hlawh tawh a, he Iraqi rawlthar hian ngaihven a hlawh chhan a pholang mek zel - Iraqi Premier League-a Al Naft striker hian Chile 3-0 an hnehna inkhelah goal hnih a khung a, goal khat dang hi Chile player Diego Valencia-a'n an lama a tih luh a ni.

Iraq U17 tan vawi riat a khelha goal kua khung tawhtu Dawood-a goal hnuhnung zawk hi freekick aṭanga lut a ni a, goal class bik a ni. Kum 16 mi striker hian hattrick siam turin hun ṭha nei mah se hun pek belha a penalty pet chu dan sak a ni - tun tournament-ah Iraq-in goal li an khung tawh a, goal thum chu Dawood hian a khung.

France an thiam

France-in an match hmasa berah 7-1 in New Caledonia an sawp a, Japan-in 6-1 in Honduras an sawp bawk. Ram pahnihin goal khung an thiam tih a chiang a, Nilaini zanah an intawng - a tawpa dingchang zawk chu France an ni. Les Bleuets tan hian Amine Gouiri chuan goal hnih a khung a, Japan tan Taisei Miyashiro chuan penalty hmangin a khung ve bawk.

Lyon rawlthar duh­awm Gouiri hian minute 13-naah goal hmahruai a khung a, goal dang khung tur erawhin minute 71-a nghah thlen a ngai. Honduras laka hattrick siamtu Keito Nakamura chuan Japan tan freekick hmangin chance duh­awm nei mah se France an vannei a, goal an chhuah lo. Gouiri bawk­­in France goal hnih­­na a khung a, Miyashiro penalty-in Japan tan awmzia a nei lo.

Honduras an chak

Japan lakah goal ruk ngawt an chhuah hnuin Honduras-in an thinrim hrik thlak nan New Caledonia an hmang a, 5-0 in an sawp - FIFA U17 World Cup-ah hnehna an la chan chian ber ṭum a ni. Honduras tan hian Carlos Mejia leh Patrick Palacios ten goal hnih ve ve an khung a, Joshua Canales chuan goal khat a thawh ve bawk.

Honduras hian minute 42 a tlin meuh chuan goal thum an khung fel der tawh a, Canales goal khung hi freekick aṭanga lut a ni. First half-ah 3-0 a hma an hruai tawh avangin Honduras hi an chak dawn tih a chiang tawh a, second half-ah Palacios-a'n goal hnihin a nemnghet leh bawk.